Acidity: গেছ–বদহজম, এচিডিটীত বিপৰ্যস্ত হৈ পৰিছে নেকি? এই ঘৰুৱা উপায়েৰে শীঘ্ৰে পাব আৰাম

আজিকালি এচিডিটিৰ সমস্যা নথকা মানুহ খুব কমেই ওলাব। অনিয়মিত খাদ্যাভাস, অনিয়মিত টোপনি, জাংক ফুড আদি খোৱাৰ ফলত দেখা দিয়ে গেষ্ট্রিকৰ সমস্যাই। পেট ফুলা, বুকু–ডিঙি জ্বলা, বদহজম আদি সমস্যাৰে জৰ্জৰিত হৈ পৰে। মূলত হজমৰ সমস্যাৰ পৰাই দেখা ডিয়ে এচিডিটি! ইয়াৰ পৰা উপশম পাবলৈ জানক কেতবোৰ ঘৰুৱা উপায়।

ৰন্ধা খাদ্যত চেনি নিদিব, কেঁচা চেনিও নাখাব। মৌ, গুড় দিব পাৰে। লগতে খাদ্যত নিমখ কমকৈ দিব। অতিৰিক্ত নিমখ খালেও গেছৰ সমস্যা হয়।

কলত প্ৰচূৰ পৰিমাণে পটাছিয়াম থাকে যিটো প্ৰাকৃতিক এণ্টাচিড। সেয়ে প্ৰতিদিনে এটাকৈ কল খাওক, এচিডিটিৰ সমস্যাৰ পৰা উপশম পাব।

তুলসীৰ পাতে পাকস্থলীত শ্লেস্মাৰ দৰে পদাৰ্থৰ উৎপাদন বঢ়ায়, আছে বায়ুনাশক উপাদান যিয়ে গেষ্ট্রিকৰ সমস্যাৰ বাবে উপকাৰী। গেছৰ সমস্যা হ’লেই ৫–৬টা তুলসী পাত চোবাই খাওক। অথবা ৩–৪টা তুলসী পাত সিদ্ধ কৰি সেই পানীত একণমান মৌ মিহলাই খাওক, আৰাম পাব।

অসময়ত চাহ–কফি খালে বুকু জ্বলা–পৰা কৰে। বিশেষকৈ খালী পেটত কফি আৰু গাখীৰ চাহ মাৰাত্মক! ৰঙা চাহ খোৱা অভ্যাস কৰক।

খোৱাৰ পিছত চফগুটি খালে ভাল হজম হয়, এচিডিটিও নহয়। এগিলাছ পানীত ১ চামুচ গুৱামুৰি নিশা তিয়াই ৰাখি পুৱা খালী পেটত সেই পানী খাওক, শৰীৰ ঠাণ্ডা ৰাখিব, গেছৰ সম্ভাৱনাও কমিব।

ঠাণ্ডা গাখীৰ খালে পাকস্থলীৰ গেষ্ট্রিক এচিড স্থিতিশীল হৈ আহে। গাখীৰত কেলচিয়াম আচে যিয়ে পাকস্থলীত এচিড তৈয়াৰ প্ৰতিৰোধ কৰে। সেয়ে এচিডিটিৰ সমস্যা হ’লেই এগিলাছ ঠাণ্ডা গাখীৰ খাওক। দৈত থকা কেলচিয়ামে পাকস্থলীত এচিড জমা হোৱা প্ৰতিৰোধ কৰে। দৈৰ লেকটিক এচিডে হজম প্ৰক্ৰিয়াও শক্তিশালী কৰে।

ডালচেনিত আছে প্ৰাকৃতিক এণ্টাচিড যিয়ে হজম ক্ষমতা বৃদ্ধি কৰে। আধা চামুচ ডালচেনিৰ গুৰি একাপ পানীত মিহলাই উতলাওক। ইয়াৰ পিছত ঠাণ্ডা কৰি পান কৰক। প্ৰতিদিনে এইদৰে তিনিবাৰ ডালচেনিৰ পানী খালে বদহজম আৰু এচিডিটিৰ মোকাবিলা কৰিব পাৰিব।