অভিনেতা প্ৰকাশ ৰাজে (Prakash Raj Marriage) সকলোকে আচৰিত কৰি পুনৰ বিয়াত বহিল নিজৰ ১১সংখ্যক বিবাহ বাৰ্ষিকীৰ দিনটোত। প্ৰকাশ ৰাজৰ (Prakash Raj Viral) তৃতীয় বিবাহৰ সকলো ফটো নিমিষতে ভাইৰেল হৈ পৰিল ছচিয়েল মিডিয়াত। 'সিংঘম'ৰ পৰা 'ৱাণ্টেড'লৈকে, প্ৰকাশ ৰাজক বলীউডৰ সৰ্বশ্ৰেষ্ঠ খলনায়ক সকলৰ মাজৰ এজন হিচাপে সকলোৱে স্বীকাৰ কৰে। ৫৮ বছৰ বৰ্ষীয় অভিনেতাজনে অলপতে নিজ পুত্ৰৰ অনুৰোধত তৃতীয় বিবাহ কৰিবলৈ বাধ্য হয়। প্ৰকাশে পুনৰ এবাৰ নিজৰে পত্নী পোনী বাৰ্মা (Pony Berma)ৰ সৈতে বিবাহপাশত আবদ্ধ হয়। অভিনেতাজনে টুইটাৰত বিয়াৰ কিছুমান ফটো ছেয়াৰ কৰে। ফটোৰ সৈতে ৰাজে বৰ সুন্দৰকৈ এটা কেপচনত কৈছে যে, "আমি আজি ৰাতি পুনৰ বিয়া পাতিলো, কিয়নো আমাৰ পুত্ৰই আমাৰ বিয়া চাবলৈ বিচাৰিছিল।" প্ৰকাশ ৰাজে পুনৰ এবাৰ পুত্ৰৰ অনুৰোধ ৰাখিবলৈকে নিজ পত্নীক বিয়া কৰালে আৰু পুত্ৰই কোৱাৰ বাবে আঙুঠিও পিন্ধাবলগীয়াত পৰে। তেওঁ টুইটাৰত দিয়া ফটোবোৰৰ মাজত পত্নীক চুমা খোৱা দৃশ্যটো ছচিয়েল মিডিয়াত ভাইৰেল হৈ পৰিছে। ৫৬ বছৰ বয়সত প্ৰকাশ ৰাজে দ্বিতীয়বাৰৰ বাবে যেন নিজৰ প্ৰেম পাবলৈ সক্ষম হ'ল। প্ৰকাশৰ প্ৰথমা পত্নী ললিতা কুমাৰীৰ সৈতে বিবাহ বিচ্ছেদ হোৱাৰ পাছত ২০০৯ চনত পোনি বাৰ্মাৰ সৈতে বিবাহপাশত আবদ্ধ হয়। এটা ফটো ছেটত পোনিৰ সৈতে ৰাজৰ প্ৰথম দেখা-দেখি হয়। পোনী কৰিঅ'গ্ৰাফ টীমৰ এগৰাকী সদস্য আছিল। ১১ সংখ্যক বিবাহ বাৰ্ষিকীৰ দিনাই প্ৰকাশে নিজৰ দ্বিতীয় পত্নীৰ সৈতে পুনৰ বিয়াত বহিল। অৱশ্যে কইনা সলনি নহ'ল। প্ৰকাশৰ প্ৰথমা পত্নীৰ ফালৰ দুই সন্তান মেঘনা আৰু পূজাৰ সৈতে পোনীৰ যথেষ্ট ভাল সম্পৰ্ক আছে। তেওঁলোকো দেউতাকৰ বিয়াত উপস্থিত আছিল।
