‘পাঠান’ৰ জৰিয়তে ৪ বছৰৰো অধিক সময়ৰ পিছত পৰ্দালৈ উভতিছে বলীউদৰ বাদশ্বাহ। বুধবাৰে অৰ্থাৎ ২৫ জানুৱাৰীত সমগ্ৰ দেশতে মুক্তিলাভ কৰিছে শ্বাহৰুখ খান, দীপিকা পাডুকণ আৰু জন আব্ৰাহাম অভিনীত বহু প্ৰতীক্ষিত ছবিখনে। নানা বিতৰ্কৰ পিছত মুক্তিৰ দিনাই অভিলেখ গঢ়িলে পাঠানে। মুক্তিৰ প্ৰথমটো দিনত কেৱল হিন্দী সংস্কৰণত বক্স অফিচ কালেকশ্যন অন্তত ৫৪ কোটি (ভাৰতীয় মুদ্ৰাত) আৰু বিশ্বব্যাপী ইয়াৰ কালেকশ্যন ১০০ কোটি টকা। জনা গৈছে, মুক্তিৰ প্ৰথম দিনা ৫৩–৫৫ কোটি টকা উপাৰ্জনেৰে অভিলেখ গঢ়িছে ‘পাঠান’ ছবিখনে। বক্স অফিচ ইণ্ডিয়াৰ প্ৰতিবেদনে এই দাবী কৰিছে। ইমানদিনে প্ৰথম দিনাৰ আয়ৰ ক্ষেত্ৰত ভাৰতত প্ৰথম স্থানত আছিল যশৰ ‘কেজিএফ টু’। মুক্তিৰ দিনা মুঠ ৫৩.৯৫ কোটি টকা উপাৰ্জন কৰিছিল এই ছবিখনে। মুক্তিৰ দিনাই এনে আয়ৰ ৰেকৰ্ড বলীউদত খুব কম। বক্স অফিচ বিশ্লেষক তৰণ আদৰ্শই টুইটাৰত লিখিছে, ‘পাঠান’ ব্লকব্লাষ্টাৰ। ষ্টাইল, স্কেল, গান, একশ্যন চমক... পাঠানত সকলো আছে। নিঃসন্দেহে ২০২৩ৰ প্ৰথম ব্লকব্লাষ্টাৰ ‘পাঠান’। অধিকসংখ্যক দৰ্শকেও ‘পাঠান’ চাই টুইটাৰত ছবিখনক লৈ ইতিবাচক ৰিভিউ দিছে। ‘পাঠান’ৰ ফাৰ্ষ্ট ডে ফাৰ্ষ্ট শ্ব’ যিসকলে চাইছে তেওঁলোকৰ মতে, ছবিখনৰ প্ৰথম ভাগতে ‘পাঠান’ ছুপাৰহিট! ‘পাঠান’ ছবিত শ্বাহৰুখ–দীপিকা–জনে ধামাকাৰ লগতে ছলমান খানৰ ১০ মিনিটৰ কেমিঅ’ চৰিত্ৰয়ো আকৰ্ষণ কৰিছে দৰ্শকক। ইমানেই শেষ নহয় চমকৰ। ছবিখনত বলীউদৰ এসময়ৰ জনপ্ৰিয় অভিনেত্ৰী ডিম্পল কাপাডিয়া আৰু অভিনেতা আশুতোষ ৰাণাৰ চৰিত্ৰই মন জয় কৰিছে দৰ্শকৰ। এই ছবিখনৰ বাবে শ্বাহৰুখ খান পাৰিশ্ৰমিক লৈছে ১০০ কোটি টকা। দীপিকা পাডুকণে লৈছে ১৫ কোটি টকা। আনহাতে, একশ্যন থ্ৰিলাৰ কেটেগৰীৰ এই ছবিখনৰ পৰিচালনাৰ বাবে সিদ্ধাৰ্থ আনন্দে লৈছে ছয় কোটি।
