Nipon Goswami : অসমীয়া চলচ্চিত্ৰত কাম কৰা প্ৰথমজন পেছাদাৰী প্ৰশিক্ষিত অভিনেতা আছিল নিপন গোস্বামী

১৯৪৭ চনৰ ছেপ্টেম্বৰ মাহত তেজপুৰৰ কলিবাৰীত জন্মগ্ৰহণ কৰিছিল নিপন গোস্বামীয়ে। অভিনয়ৰ প্ৰতি গভীৰ আগ্ৰহ থকা গোস্বামীয়ে তেজপুৰৰ সাংস্কৃতিক পৰিৱেশৰ সৈতে চিনাকি হৈছিল শৈশৱতে। তেওঁৰ পিতৃ চন্দ্ৰধৰ গোস্বামী এজন অভিনেতা হোৱাৰ লগতে মাতৃ নিৰুপমা গোস্বামী আছিল এগৰাকী বহুমুখী কণ্ঠশিল্পী।

কলিবাৰী নিম্ন প্ৰাথমিক বিদ্যালয় আৰু তেজপুৰ চৰকাৰী হাইস্কুলৰ পৰা স্কুলীয়া শিক্ষা গ্ৰহণ কৰা গোস্বামীয়ে ১৯৬৫ চনত পুনেৰ এফ টি আই আইলৈ গৈ স্নাতক ডিগ্ৰী লাভ কৰি অসমীয়া চলচ্চিত্ৰত কাম কৰা প্ৰথমজন পেছাদাৰী প্ৰশিক্ষিত অসমীয়া অভিনেতা ৰূপে পৰিগণিত হয়।

১৯৫৭ চনত ফণী শৰ্মা পৰিচালিত পিয়লি ফুকন চলচ্চিত্ৰত তেওঁ শিশুশিল্পী ৰূপে অভিনয় কৰিছিল। সেই চিনেমাখনত দেউতাক চন্দ্ৰধৰ গোস্বামীয়ে মুখ্য চৰিত্ৰত অভিনয় কৰিছিল। শিশুশিল্পী ৰূপে নিপন গোস্বামীৰ এয়া আছিল চিনেমা সিল্পত প্ৰথম আত্মপ্ৰকাশ।

পুনে এফ টি আই আইত চূড়ান্ত বৰ্ষত অধ্যয়ন কৰি থকাৰ সময়তে নিপন গোস্বামীয়ে প্ৰয়াত অমৰ পাঠকৰ ছবি 'সংগ্ৰাম'ৰ মুখ্য চৰিত্ৰত অভিনয় কৰাৰ প্ৰস্তাৱ পাইছিল। তেওঁ শ্বুটিঙৰ বাবে কলকাতালৈ গৈছিল আৰু সেয়াই তেওঁৰ যৌৱন কালৰ চিনেমা যাত্ৰাৰ আৰম্ভণি। ১৯৬৮ চনত মুক্তি লাভ কৰিছিল সংগ্ৰামে।

'সংগ্ৰাম'ৰ পিছত নিপন গোস্বামীয়ে ব্ৰজেন বৰুৱাৰ দ্বাৰা পৰিচালিত 'ডাঃ বেজবৰুৱা'ত নায়কৰ ভূমিকাত অৱতীৰ্ণ হৈছিল। এইখনেই আছিল তেওঁৰ কেৰিয়াৰৰ টাৰ্নিং পইণ্ট আৰু তেতিয়াৰ পৰা পিছলৈ ঘূৰি চাবলৈ আহৰি পোৱা নাছিল গোস্বামীয়ে। ইখনৰ পিছত সিখন চিনেমাত তেওঁ আছিল মুখ্য অভিনেতা।

তেজপুৰৰ প্ৰসিদ্ধ বাণ থিয়েটাৰৰ অভিনয় চাই ডাঙৰ হোৱা গোস্বামী নাটকত লৈ আছিল বেছি উৎসাহী। চলচ্চিত্ৰৰ মাজেৰে এটা ভিত্তি তৈয়াৰ কৰিলেও মঞ্চ নাটৰ প্ৰতি থকা প্ৰবল হেঁপাহে ভ্ৰাম্যমাণ থিয়েটাৰ কোহিনুৰ, হেঙুল, আৱাহন আদিত অভিনয় কৰিছিল।

বহুতে জ্ঞাত নহয় যে নিপন গোস্বামীয়ে আজিলৈকে ৮খনতকৈও অধিক বলীউদৰ ছবিত অভিনয় কৰিছে। তেওঁৰ শেহতীয়া মুক্তিপ্ৰাপ্ত ছবি আছিল 18.11 – A Code of Secrecy, পৰিচালক আছিল মোহিবুল হক। তেওঁৰ বলীউডত মুক্তি লাভ কৰা কেইখনমান হৈছে ডামিনি, দো ভাই, দো আঞ্জানে ইত্যাদি।

পুনে ফিল্ম ইনষ্টিটিউটত অধ্যয়ন কৰি থাকোঁতে তেওঁৰ সহপাঠী আছিল সুভাষ ঘাই, শত্ৰুঘ্ন সিন্‌হা, নবীন নিশ্চল, জালাল আগা, ৰেহেনা চুলতানা, ৰাকেশ পাণ্ডে আদি প্ৰখ্যাত অভিনেতা আৰু কথাছবি পৰিচালক।

অসমীয়া ভাষাৰ চলচ্চিত্ৰ সংগ্ৰাম (১৯৬৫), ডক্তৰ বেজবৰুৱা, শেষ বিচাৰ, আজলী নবৌ, ককাদেউতা নাতি আৰু হাতী, নয়নমণি, দূৰণিৰ ৰং, ঘৰ–সংসাৰ, প্ৰতিমা, পূজা, মৰীচিকা, মইনাজান, মানৱ আৰু দানৱ, শকুন্তলা আৰু শংকৰ জোচেফ আলি, প্ৰতিদান, চিৰাজ, হিয়া দিয়া নিয়া, ককাদেউতাৰ ঘৰজোঁৱাই, কাদম্বৰী, মিঠা মিঠা লগনত, পলে পলে উৰে মন, ব'হাগৰ দুপৰীয়া আদি প্ৰায় ১০০খন চিনেমাত অভিনয় কৰিছিল নিপন গোস্বামীয়ে।