জয় হো..., দিল ছে ৰে...,সংগীত ওস্তাদ এ.আৰ. ৰহমানৰ সংগীতত নাচি উঠিল গুৱাহাটী; অসমত প্ৰথমবাৰৰ বাবে এ.আৰ. ৰহমানৰ সংগীতানুষ্ঠান

অসমত পোন প্ৰথমবাৰৰ বাবে সংগীত ওস্তাদ এ.আৰ. ৰহমান উপস্থিত হয়। তেওঁ ১ ফেব্ৰুৱাৰীত গুৱাহাটীৰ বৰ্ষাপাৰা এচিএ ক্ৰিকেট ষ্টেডিয়ামত এটা সংগীতানুষ্ঠানৰ বাবে অসমলৈ আহে। তেওঁ ‘Concert for Peace’ (শান্তিৰ বাবে সংগীতানুষ্ঠান) শীৰ্ষৰে গুৱাহাটীত এটা অনুষ্ঠান কৰে। এটা বৃহত্‍ দলৰ সৈতে সংগীতানুষ্ঠানত গীতেৰে ৰাইজৰ মাজত আনন্দৰ জোৱাৰ বিলাবলৈ বিভিন্ন ধৰণৰ সংগীত পৰিৱেশন কৰে।

অস্কাৰপ্ৰাপ্ত গীত ‘জয় হো’ ৰে সংগীতানুষ্ঠানৰ আৰম্ভণি কৰি বিভিন্ন গীতৰ উপহাৰ আগবঢ়ালে এ.আৰ. ৰহমানে। এই অনুষ্ঠানত বহু নতুন তথা জনপ্ৰিয় গায়কক নিজৰ লগত গীত পৰিৱেশন কৰাই দৰ্শকৰ মন মোহিলে সংগীত উস্তাদগৰাকীয়ে।

বিশ্ববিখ্যাত ভাৰতীয় সংগীত ওস্তাদ খ্যাত অস্কাৰ বিজয়ী এ.আৰ. ৰহমানে সংগীতানুষ্ঠানত আটক ধুনীয়াকৈ সংগীতানুষ্ঠানৰ মঞ্চ, বিভিন্ন থ্ৰীডি গ্ৰাফিকচ, লাউডস্পীকাৰ আৰু লাইটৰ ব্যৱহাৰে গোটেই ষ্টেডিয়াম উজলাই তুলিলে।

এই সংগীতানুষ্ঠানত অসমৰ এগৰাকী উঠি অহা গায়িকা অন্তৰা নন্দীয়েও এ.আৰ. ৰহমানৰ সৈতে গীত পৰিৱেশন কৰে।

ইয়াৰোপৰি, এ.আৰ. ৰহমানৰ সংগীতানুষ্ঠানত অসমৰ মুখ্যমন্ত্ৰীয়ে পত্নী তথা পৰিয়ালৰ সৈতে উপস্থিত হৈ তেওঁৰ গীত উপভোগ কৰে। লগতে, ৰাজ্যখনৰ ৰাজ্যপালো অনুষ্ঠানটোত উপস্থিত হৈ এ.আৰ. ৰহমানৰ সংগীতানুষ্ঠান উপভোগ কৰে।