মাতৃ দিৱসত আৱেগিক জাহ্নৱী কাপুৰ। প্ৰতিবছৰে এই দিনটোত আটাইতকৈ বেছিকৈ মাতৃৰ অভাৱ অনুভৱ কৰে সেইসকল সন্তানে যাৰ মাতৃ বৰ্তমান এই পৃথিৱীত নাই। মাতৃ দিৱস উপলক্ষে বলীউদৰ অভিনেত্ৰী জাহ্নৱী কাপুৰে তেওঁৰ স্বৰ্গীয় মাতৃ অভিনেত্ৰী শ্ৰীদেৱীক স্মৰণ কৰে৷ এখন থ্ৰোবেক ফটো শ্বেয়াৰ কৰে৷ ফটোখনত, শ্ৰীদেৱীয়ে শিশু জাহ্নৱীৰ বাহুত ধৰি আছে। ছবিখনৰ সৈতে, জাহ্নৱীয়ে এক আৱেগিক কেপশ্যন লিখিছে, শ্ৰীদেৱী তেওঁৰ অনুপস্থিতিতো শ্ৰেষ্ঠ মাতৃ। তেওঁ লিখিছে, "তোমাৰ অনুপস্থিতিতো, মই প্ৰতিদিনে তোমাৰ ভালপোৱা অনুভৱ কৰো। তুমি পৃথিৱীৰ সৰ্বশ্ৰেষ্ঠ মাতৃ। মই তোমাক ভাল পাওঁ।" জাহ্নৱীৰ বন্ধু আৰু উদ্যোগৰ সহকৰ্মীসকলে শ্ৰীদেৱীলৈ শ্ৰদ্ধা জনায়৷ অনন্যা পাণ্ডে, মহিপ কাপুৰ আৰু মনীষ মালহোত্ৰাই পোষ্টটোত কমেণ্ট কৰিছিল। ২০১৮ চনত দুৰ্ঘটনাবশত মৃত্যু হয় শ্ৰীদেৱীৰ। তাৰ পিছৰ পৰাই জাহ্নৱী আৰু তেওঁৰ ভগ্নী খুছিয়ে প্ৰতি মুহূৰ্ততে মাকৰ অভাৱ অনুভৱ কৰি আহিছে।
