দেশত কোৰোণা সংক্ৰমণ দিনক দিনে বাঢ়ি যোৱাৰ কাৰণে সমগ্ৰ দেশ এতিয়া সন্ত্ৰস্ত। ইয়াৰ মাজতে মঙলবাৰে নিশাৰ পৰা সমগ্ৰ দেশত ২১দিনৰ কাৰণে জাৰি কৰা হৈছে ৰাষ্ট্ৰীয় লকডাউন।
দেশজোৰা লকডাউন ঘোষণা কৰা হৈছে ৰাষ্ট্ৰীয় দুৰ্যোগ আইনৰ অধীনত। প্ৰধানমন্ত্ৰীৰ ঘোষণাৰ লগে লগে ৰাজ্যসমূহে নিজা নিজাকৈ ঘোষণা কৰা লকডাউনৰ পৰিৱৰ্তে সমগ্ৰ দেশত একে আইনৰ অধীনত লকডাউন বলৱৎ হ’ল। ইতিমধ্যে কেন্দ্ৰীয় চৰকাৰে কাৰ্যালয় সমূহ বন্ধ ৰখাৰ নিৰ্দেশ দিছে। তথাপিউ লকডাউনৰ সময়ত প্ৰতিৰক্ষা, কেন্দ্ৰীয় সশস্ত্ৰ আৰক্ষীৰ বাহিনী, ট্ৰেজাৰী, পেট্ৰ’ল পাম্প, বিদ্যুৎ উৎপাদনকাৰী সংস্থা, পোষ্ট অফিচ, নেচনেল ইনফৰ্মেটিক্স চেণ্টাৰ খোলা থাকিব।
ৰাজ্য চৰকাৰৰ অফিচ, কেন্দ্ৰীয় শাসিত অঞ্চলৰ অফিচ বন্ধ থাকিব। বন্ধ থাকিব পৌৰসভাৰ কাৰ্যালয়। অৱশ্যে আৰক্ষী, হোমগাৰ্ড, চিভিল ডিফেন্স, অগ্নি নিৰ্বাপক বাহিনী, দুৰ্যোগ প্ৰশমন বাহিনী, সংশোধনাগাৰ আদি খোলা থাকিব। খোলা থাকিব জিলা প্ৰশাসনৰ অফিচ তথা কোষাগাৰো। বিদ্যুৎ আৰু জলসেৱা খোলা থাকিব। ইমাৰজেন্সী সেৱা যেনে পানী বা চেনিটাইজেশ্যনৰ সৈতে জৰিত পৌৰসভাৰ সকলো কৰ্মীয়ে কাম কৰিব। এই সকলোবোৰ কাৰ্যালয় ন্যূনতম কৰ্মচাৰীৰ দ্বাৰা পৰিচালিত হ’ব। আনসকলে ঘৰৰ পৰা কাম কৰিব।
হাস্পতাল তথা হাস্পতালৰ সৈতে জৰিত ইউনিট যেনে ডিচপেন্সাৰী, কেমিষ্ট তথা মেডিকেল ইকুইপমেণ্টৰ দোকান, লেব, ক্লিনিক, নাৰ্চিং হোম, এম্বুলেন্স সেৱাই কাম কৰিব। সমগ্ৰ মেডিকেল ষ্টাফৰ যাতায়তৰ কাৰণে বিশেষ পৰিৱহনৰ ব্যৱস্থা কৰিব লাগিব।
কি কি সেৱা খোলা থাকিব এই লকডাউনত? ১.ৰেচনৰ দোকান, শাক–পাচলিৰ দোকান, গাখীৰ তথা ডায়েৰী সামগ্ৰীৰ দোকান। ২. বেংক ইন্সুৰেন্স সংস্থা তথা এটিএম। ৩. প্ৰিণ্ট তথা ইলেকট্ৰনিক মিডিয়া। ৪. টেলিকম, ইণ্টাৰনেট সেৱা, ব্ৰডকাষ্টিং তথা কেবল সেৱা। তথাপিও যিমান সম্ভৱ ৱৰ্ক ফ্ৰম হোম কৰাৰ পৰামৰ্শ দিয়া হৈছে। ৫.খাদ্য তথা ঔষধ ডেলিভাৰী দিয়াৰ ই–কমাৰ্চৰ মাধ্যম। ৬.পেট্ৰ’ল পাম্প, এলপিজি সেৱা চলি থাকিব।
লগতে জনোৱা হৈছে যে জৰুৰীকালীন সেৱা বাদ দি বিমান, ৰে’ল বা সকলো ধৰণৰ পৰিবহন সেৱা বন্ধ থাকিব। হোটেল সেৱা বন্ধ থাকিব। য’ত মানুহ আৱদ্ধ হৈ আছে তাতহে সকলো খোলা থাকিব। সকলো শিক্ষামূলক প্ৰতিষ্ঠান বন্ধ ৰখাৰ নিৰ্দেশ দিয়া হৈছে। কেৱল সিমানেই নহয় মন্দিৰ, তীৰ্থস্থান সকলো বন্ধ ৰখাৰ নিৰ্দেশ দিয়া হৈছে। কোনো ধৰণৰ উৎসৱ পালন কৰিব নোৱাৰিব এই সময়ত। এই সময়ত কোনো লোকৰ মৃত্যু হ’লে তাত ২০জনৰ অধিক লোক গোট খাব নোৱাৰিব। চৰকাৰে স্পষ্টভাৱে জনাই দিছে যে যদিহে কোনোবাই এই নিয়মবোৰ অমান্য কৰে তেনেহ’লে কঠোৰ আইনী ব্যৱস্থা গ্ৰহণ কৰা হ’ব।
