Afghanistan's Money : আফগানিস্তানৰ মুদ্ৰা ক'ত ছপা কৰে, ভাৰতৰ মুদ্ৰাতকৈ 'আফগানি'ৰ সুৰক্ষা বেছি নেকি, তালিবানৰ দখলৰ পিছত কি অৱস্থা 'আফগানি'ৰ

আফগানিস্তানত তালিবানৰ শাসনৰ পিছতে দেশখনৰ বেংক আৰু মুদ্ৰা ব্যৱস্থাক লৈও ব্যাপক চৰ্চা হৈছে। এটা সময়ত আফগানিস্তানত আফগান টকা চলিছিল কিন্তু ১৯২৫ চন মানৰ পৰা তাত আফগান মুদ্ৰা 'আফগানি' (Afghani)ৰ প্ৰচলন হয়।

আফগানি মুদ্ৰা ছপোৱা আৰু বিতৰণৰ কাম কৰে দেশখনৰ কেন্দ্ৰীয় বেংক 'দি আফগানিস্তান বেংক'এ। কাবুলত ইয়াৰ মুখ্য কাৰ্যালয় আছে আৰু সমগ্ৰ দেশখনত ইয়াৰ ৪৬টা শাখা আছে। তালিবানে কাবুল দখল কৰাৰ পিছত বেংকটোৰ মুৰব্বীৰ পদটো খালী হৈ আছে। ১৯৯৬ চনত প্ৰথমবাৰ শাসনলৈ অহাৰ সময়ত তালিবানে আফগানি (Afghani) মুদ্ৰাৰ প্ৰচলন অব্যাহত ৰাখিছিল।

আফগানিস্তানত ১ আফগানিৰ পৰা আৰম্ভ কৰি ১০০০ আফগানিলৈকে নোটৰ প্ৰচলন আছে। প্ৰতি ৫ বছৰৰ মূৰত দি আফগানিস্তান বেংকে নতুন নোট ছপা কৰে। কিন্তু এই নোট আফগানিস্তানত ছপোৱা নহয়।

আফগানি নোট ইংলেণ্ডস্থিত বিশ্বৰ সকলোতকৈ ডাঙৰ মুদ্ৰা ছপা কৰা প্ৰেছ 'দে লা ৰুৱে'ত ছপা কৰা হয়। এই প্ৰেছটোত বিশ্বৰ ১৪০খন দেশৰ নোট ছপা হয়। ১৯৮০ৰ দশকত আফগানিস্তানৰ মুদ্ৰা ৰাছিয়াৰ প্ৰেছত ছপা হৈছিল। কিন্তু ২০০২ চনত হামিদ কাৰজাইৰ নেতৃত্বত গঠন হোৱা চৰকাৰে নোট ছপাৰ দায়িত্ব বৃটেইনৰ কোম্পানীটোক দিয়ে।

আফগানি নোটৰ ডিজাইনো বৃটেইনৰ কোম্পানীটোৱেই কৰে। ইয়াৰ সুৰক্ষা ব্যৱস্থা ইমানেই নিখুত যে আফগানি নোটৰ জাল নোট প্ৰস্তুত কৰাটো প্ৰায় অসম্ভৱ। আফগানি নোট ১, ৫, ১০, ৫০, ১০০, ৫০০ আৰু ১০০০ৰ মূল্যত ছপা হয়।

ভাৰতীয় টকাৰ হিচাপত আফগানিৰ মূল্য হৈছে ১০০ টকাত ১১৫ আফগানি। এইমুহূৰ্তত আফগানিৰ মূল্য ভয়ংকৰভাবে কমা নাই যদিও পৰিৱৰ্তিত সময়ত ইয়াৰ অৱমুল্যায়ন হোৱাৰ সম্ভাৱনাই অধিক।