Farmer Couple of Barpeta: এইবাৰ হালধীয়া ফুলকবি, হালধীয়া বিলাহী আৰু বেঙেনাবুলীয়া বন্ধাকবিৰ খেতিৰে উজলি উঠিছে সৰ্থেবাৰীৰ কৃষক দম্পতী
ইপিনে ক'লাধানৰ লগতে এইবাৰ সেউজীয়া ধানৰ খেতি কৰিও সফল হ'বলৈ সক্ষম হোৱা কৃষক দম্পতীটোৱে পূৰ্বেও ষ্ট্ৰবেৰী খেতি কৰি ধন উপাৰ্জন কৰিছিল। সম্পূৰ্ণ সুকীয়া চিন্তাৰে কৃষিকৰ্মত আগবঢ়া দম্পতীটোৱে বছৰি এটা ভাল আয় কৰাৰ পথ এইদৰে বাচি লৈছে।
নিবনুৱা সমস্যাৰে ভাৰাক্ৰান্ত আৰু কৰ্মবিমুখ বুলি অপবাদ থকা অসমীয়া যুৱক-যুৱতীৰ সন্মুখত এতিয়া জয়া বৰগোহাঞি ডেকা আৰু কমলেশ্বৰ ডেকা হৈ পৰিছে আদৰ্শ ৷ মুকলি আকাশৰ তলত নিজ ইচ্ছাৰে খেতি কৰি বীজৰ পৰা গজালি মেলি ফল-ফুলেৰে উপচি পৰা খেতিডৰাই কিদৰে মনক সন্তুষ্টি প্ৰদানৰ লগতে উপাৰ্জনৰো পথ দিব পাৰে, সেই কথা দেখুৱাই দিছে কৃষক দম্পতী দুগৰাকীয়ে ৷
এইবাৰ হালধীয়া ফুলকবি, হালধীয়া বিলাহী আৰু বেঙেনাবুলীয়া বন্ধাকবিৰ খেতিৰে কৃষি ক্ষেত্ৰলৈ নতুন বতৰা কঢ়িয়াই আনিছে বৰপেটাৰ সৰ্থেবাৰীৰ সমীপৰ কামাৰপাৰা গাঁৱৰ কৃষক দম্পতীটোৱে ৷ সম্পূৰ্ণ জৈৱিক পদ্ধতিৰে খেতি কৰি অসম ৰাজ্যিক শ্ৰেষ্ঠ কৃষক আৰু উত্তৰ-পূবৰ আদৰ্শ কৃষক সন্মান লাভ কৰিবলৈ সক্ষম হোৱা কমলেশ্বৰ ডেকাই ন ন কৃষিৰে সকলোৰে দৃষ্টি আকৰ্ষণ কৰিবলৈ সক্ষম হৈছে ৷
এইবেলি তেওঁলোকে পৰীক্ষামূলকভাৱে আৰম্ভ কৰিছে হালধীয়া ফুলকবি, হালধীয়া বিলাহী আৰু বেঙেনাবুলীয়া বন্ধাকবিৰ খেতি ৷ মেঘালয়ৰ উমিয়ামত থকা কেন্দ্ৰীয় কৃষি বিশ্ববিদ্যালয়ৰ পৰা বীজ সংগ্ৰহ কৰি আৰম্ভ কৰা হালধীয়া ফুলকবি, হালধীয়া বিলাহী আৰু বেঙেনাবুলীয়া বন্ধাকবিৰ খেতিয়ে আশাৰ বতৰা কঢ়িয়াই আনিছে কৃষক দম্পতিটোলৈ ৷
