মৰাণত হোৱা শিলাবৃষ্টিত কাহিলীপুৱাতেই দেখা গ'ল শ্বিলংসদৃশ পৰিৱেশ

পুহ মাহত শীতৰ প্ৰকোপ আটাইতকৈ বেছি পৰে। শীতকালৰ ঠাণ্ডাত মানুহে বিভিন্ন ধৰণৰ স্বাস্থ্যজনিত সমস্যাতো ভুগিবলগা হয়। চৰ্দি, জ্বৰ, কাহ ইত্যাদিৰ মাজেৰে মানুহে শীতকালৰ এই দিনকেইটা পাৰ কৰা দেখা যায়। এই দিনকেইটাত মানুহে জুইৰ তাপ লোৱা পৰিলক্ষিত হয় কিয়নো জাৰৰ দিনত জুইৰ তাপে মানুহক শীতৰ পৰা বহু পৰিমাণে সকাহ দিয়ে।

বৰ্তমান আমেৰিকাকে ধৰি বিশ্বৰ বিভিন্ন ঠাইতে শীতৰ প্ৰভাৱ দেখিবলৈ পোৱা গৈছে। আমেৰিকাত বিগত কেইবাদিন ধৰি হোৱা তুষাৰপাতে অঞ্চলবোৰ ঢাকিছে। এফালে প্ৰাকৃতিক সৌন্দৰ্যই সকলোকে মোহিত কৰিছে যদিও আনহাতে সেই ঠাইৰ লোকসকলে বিভিন্ন সমস্যাত ভুগিবলগা হৈছে।

কিন্তু এইবাৰ অসমৰ এটা অঞ্চল মৰাণত শিলাবৃষ্টিয়ে সমগ্ৰ ঠাইখন এক নান্দনিক সৌন্দৰ্যৰে পূৰ্ণ হৈ পৰিছে।

নৱবৰ্ষৰ প্ৰাকমুহূৰ্তত হোৱা শিলাবৃষ্টিত যেন বৰফৰ দেশত পৰিণত হৈছে উজনি অসম। ডিব্ৰুগড়, তিনিচুকীয়াৰ বিভিন্ন ঠাইতো শিলাবৃষ্টিত শুভ্ৰ দলিচা যেন হৈ পৰিছে।

বছৰটোৰ বিদায়বেলাত ৰাজ্যবাসীয়ে শীতৰ আমেজ লৈছে। শিশুসকলে বৰফৰে খেলিছে।

এফালে শিলাবৃষ্টিৰ প্ৰাকৃতিক সৌন্দৰ্যৰে অসমৰ এই অঞ্চলটো সজাই তোলাৰ লগতে শিশুসকল আনন্দত মতলীয়া যদিও এনে পৰিৱেশত শীতৰ প্ৰকোপৰ পৰা নিজক ৰক্ষা নকৰিলে বেমাৰ আজাৰত পৰাটো খাটাং।