দীৰ্ঘদিনীয়া প্ৰেমৰ অন্তত বিবাহপাশত আবদ্ধ হ'ল আলফা নেতা অনুপ চেতিয়া ওৰফে গোলাপ বৰুৱাৰ কন্যা বন্যা বৰুৱাই। দুৰ্গাপূজাৰ সময়তে অনুপ চেতিয়া আৰু মণিকা বৰুৱাৰ কন্যা বন্যাৰ বিবাহকাৰ্য সম্পন্ন হয়। বাংলাদেশৰ সন্তান তথা অষ্ট্ৰেলিয়া নিৱাসী অনিৰ্বাণ চৌধুৰীৰ সৈতে বিবাহপাশত আবদ্ধ হয় বন্যাই। আলফা নেতাগৰাকী সপৰিয়ালে বাংলাদেশত আত্মগোপন কৰি থকা অৱস্থাত বন্যা বৰুৱাই লগ পাইছিল অনিৰ্বাণক। অনিৰ্বাণ চৌধুৰী বাংলাদেশৰ কুমিল্লাৰ সন্তান। তেওঁ বৰ্তমান অষ্ট্ৰেলিয়াৰ বাসিন্দা। নতুন কইনা বন্যাক লৈ অষ্ট্ৰেলিয়া গমন কৰিবলগীয়া চৌধুৰীয়ে নৱেম্বৰত মেলবৰ্নৰ ইস্কন মন্দিৰতো তেওঁৰ পৰিয়াল তথা বন্ধু-বৰ্গৰ উপস্থিতিত বিবাহকাৰ্যৰ আন এক আনুষ্ঠানিকতাৰ আয়োজন কৰিছে। আলফা নেতাগৰাকীৰ কন্যা বন্যা বৰুৱাই বাংলাদেশৰ ধানমান্দিস্থিত মাষ্টাৰমাইণ্ড আন্তঃৰাষ্ট্ৰীয় স্কুলত পঢ়ি থকা কালত লগ পাইছিল অনিৰ্বাণক। শেষত দুয়োগৰাকীৰ প্ৰেমক আলফা নেতাগৰাকীৰ পৰিয়ালে স্বীকৃতি দিয়ে আৰু দুৰ্গাপূজাৰ সময়তে বিবাহকাৰ্য সম্পন্ন কৰে। আলফা নেতাগৰাকীয়ে কয় যে দুয়োৰে ইচ্ছাৰ প্ৰতি সঁহাৰি দি তেওঁলোকৰ বিবাহকাৰ্য সম্পন্ন কৰা হয়। তেওঁ লগতে বাংলাদেশৰ জনতাৰ পৰাও নৱদম্পতীৰ প্ৰতি আশীৰ্বাদ কামনা কৰে।
