অসমৰ চুটি ছবি "The man who 'speaks‘ nature" লৈ আন্তঃৰাষ্ট্ৰীয় স্বীকৃতি

অসমৰ চুটি ছবি ‘The Man Who 'Speaks‘ Nature’ লৈ আন্তঃৰাষ্ট্ৰীয় স্বীকৃতি। অসমৰ চুটি ছবি "ডি মেন হো স্পিকছ নেচাৰ"( the man who speaks nature) আন্তঃৰাষ্ট্ৰীয় পৰ্যায়ৰ প্ৰকৃতি বিষয়ক শ্ৰেষ্ঠ ছবি শিতানৰ বঁটাৰ বাবে নিৰ্বাচিত হৈছে ৷

ইউৰোপ মহাদেশৰ হাংগেৰীত অনুষ্ঠিত হ’বলগীয়া পঞ্চম আন্তঃৰাষ্ট্ৰীয় প্ৰকৃতি বিষয়ক ছবি মহোৎসৱত( 5th International Nature Film Festival Godollo) শ্ৰেষ্ঠ ছবি শিতানৰ বাবে ছবিখন নিৰ্বাচিত হোৱাৰ খবৰ ছবিখনৰ পৰিচালক ধৃতিমান কাকতিক আযোজক পক্ষৰ পৰা আজি এক ই-মেইল পত্ৰ যোগে জনোৱা হৈছে ৷

পত্ৰখনত আয়োজক সমিতিয়ে চলিত মে’ মাহৰ ২৪ আৰু ২৫ তাৰিখে হাংগেৰীৰ ৰাজধানী বোডাপেষ্টৰ পৰা ৩০ কিলোমিটাৰ নিলগৰ গদল’ চহৰত অনুষ্ঠিত হ’বলগীয়া দুদিনীয়া সমাৰোহ আৰু বঁটা বিতৰণী অনুষ্ঠানত যুৱ পৰিচালকজনক উপস্হিত থাকিবলৈ নিমন্ত্ৰণ জনাইছে ৷

পত্ৰখনত লগতে মহোৎসৱত উপস্হিত থাকিবৰ বাবে যাতায়ত আৰু থকা খোৱাৰ খৰচ আয়োজক সমিতিয়ে বহন কৰিব বুলি জনাইছে ৷ উল্লেখ্য যে এই ছবিখন বোকাখাতৰ দুই যুৱক ধৃতিমান কাকতি আৰু ৰক্তিম হাজৰিকাই নিৰ্মাণ কৰিছে আৰু ইয়াত ধৃতিমান কাকতি পৰিচালক, ৰক্তিম হাজৰিকা চিনেমাট‘গ্ৰাফাৰ আৰু সম্পাদক তথা প্ৰৱাল বৰা ছবিখনৰ প্ৰচাৰ আৰু বিতৰণৰ লগত জড়িত ৷

এই ছবিখনে ইতিমধ্যে ষষ্ঠ ব্ৰহ্মপুত্ৰ ভেলী চুটি ছবি মহোৎসৱত দ্বিতীয় শ্ৰেষ্ঠ ছবি হিচাবে বঁটা লাভ কৰাৰ ওপৰি মুম্বাইত প্ৰথমবাৰৰ বাবে আয়োজিত ফিল্ম ক্ৰিটিক চইচ ছৰ্ট ফিল্ম এৱাৰ্ডছৰ( CCSFA) তিনিটা শাখাত মনোনয়ন লাভ কৰিছিল ৷

ছবিখন ইতিমধ্যে কেইবাটাও ৰাষ্ট্ৰীয় পৰ্যায়ৰ মহোৎসৱত প্ৰদৰ্শিত হৈছে আৰু প্ৰকৃতি প্ৰেমী সকলৰ দৃষ্টি আকৰ্ষণ কৰিছে ৷ এই চুটি ছবিখন কাজিৰঙাৰ বচাগাঁৱৰ অক্লান্ত পৰিবেশকৰ্মী মনোজ গগৈৰ পৰিৱেশ সম্পৰ্কীয় কৰ্মৰ ওপৰত আধাৰিত ৷

ছবিখনৰ পৰিচালক ধৃতিমান কাকতি বৰ্তমান এ,পি,গোৱেল চিমলা ইউনিভাৰ্ছিটিৰ বি,জে,এম,চি, পাঠ্যক্ৰমৰ দ্বিতীয় বাৰ্ষিকৰ ছাত্ৰ , চিনেমাট'গ্ৰাফাৰ তথা সম্পাদক ৰক্তিম হাজৰিকা বি,চি,এ, পাঠ্যক্ৰমৰ ছাত্ৰ আৰু প্ৰৱাল বৰা ‘জলপ্ৰপাত‘, ‘নক্ষত্ৰ‘ৰ দৰে বহুল জনপ্ৰিয় গীত প্ৰযোজনা কৰা "ৰেইনফৰেষ্ট ৰেকৰ্ডছ“ৰ লগত জড়িত ৷