''বেয়া মন্তব্যবোৰ একাষৰীয়াকৈ থৈ ভাল মন্তব্যবোৰৰ প্ৰেৰণাত আগুৱাই যাম''- নাগাৰা নামৰ শিল্পী কৰীশ্মা নাথ

নাগাৰা নাম গাই ভাইৰেল হোৱা ছিপাঝাৰৰ কৰীশ্মা নাথক লৈ ৰাজ্যজুৰি চলি আছে চৰ্চা। এই চৰ্চা নাগাৰা নাম বিকৃত কৰা বুলি সদৌ অসম নাগাৰা নাম সংঘই কৰীশ্মাৰ ওপৰত তোলা অভিযোগক লৈ চলিছে। বাদ আৰু বিবাদৰ মাজত আগবাঢ়ি যোৱা চৰ্চা সন্দৰ্ভত কৰীশ্মা নাথৰ মতামত কি জানিবলৈ আমাৰ সাংবাদিক নৱজ্যোতি মহন্ত উপস্থিত হৈছিল নাথৰ বাসগৃহত। চাও আহক নাথে কি মত প্ৰকাশ কৰিলে।

৪ বছৰৰ পৰা নৃত্যৰ শিক্ষা লোৱা কৰীশ্মা নাথে সপ্তমমানত পঢ়ি থকাৰ পৰা নাগাৰা নাম গাবলৈ আৰম্ভ কৰিছিল। তেতিয়াৰ পৰা নাগাৰা নামৰ সৈতে জড়িত হৈ তেওঁ ৰাইজৰ পৰা অৰ্জন কৰিছে সমাদৰ।

শেহতীয়াকৈ নাগাৰা নাম গোৱা এটা সৰু ভিডিঅ' ক্লিপ সামাজিক মাধ্যমত ভাইৰেল হৈ পৰাত কৰীশ্মা নাথে বিপুল জনপ্ৰিয়তা লাভ কৰে আৰু সকলোৱে তেওঁৰ প্ৰতি প্ৰবল কৌতূহল অনুভৱ কৰে।

এনে সময়তে সদৌ অসম নাগাৰা নাম সংঘই কৰীশ্মা নাথে নাগাৰা নামৰ বিকৃতিকৰণ কৰা বুলি অভিযোগ তোলে আৰু এই সন্দৰ্ভত বাদ-বিবাদ আৰম্ভ হয়। বহুতে তেওঁক লৈ দিয়ে কু-মন্তব্যও।

এই সন্দৰ্ভত সোধোঁতে নাথে কয়- এই বিষয়ত গুৰুত্ব নিদিওঁ, মোক গুৰু আৰু বহু বিশেষজ্ঞই কৈছে মোৰ নাগাৰা তেওঁলোকে বেয়া পোৱা নাই। বহু সংগ্ৰাম কৰি নাগাৰা নামৰ সৈতে জড়িত হৈ আছোঁ। গোটেই নিশা নাম গাই পুৱা নোশোৱাকৈ কলেজলৈ গৈছোঁ। আজি ২০ বছৰ বয়সত সংগ্ৰামৰ মাজেৰে জীয়াই আছোঁ। এনে সময়ত মোক লৈ যিসকলে বেয়া মন্তব্য কৰিছে, সেয়া একাষৰীয়াকৈ থৈ ভাল মন্তব্য কৰাসকলৰ আশিস লৈ আগুৱাই যাম।