ভোগালীক আদৰাৰ বাবে সাজু প্ৰতিজন অসমীয়া। উৰুকাৰ নিশা লগে–ভাগে এসাঁজ খাবলৈ প্ৰস্তুতি চলাইছে প্ৰতিজন অসমীয়াই। গুৱাহাটী মহানগৰীতো ভোগালী বিহু উপলক্ষে বিভিন্ন খাদ্য সম্ভাৰেৰে ভৰি পৰিছে বজাৰ। লাড়ু–পিঠা, চিৰা–দৈৰ লগতে বিভিন্ন সুস্বাদু খাদ্য সম্ভাৰেৰে উভৈনদী মহানগৰীৰ বজাৰ। বিহুৰ দিনাখন চিৰা–দৈ নাখালে বিহু যেন আধৰুৱা! সেই আনন্দ দিবলৈ সৰভোগৰ পৰা আহিছে এঠা দৈ। ভোগালীৰ বজাৰ কৰিবলৈ বজাৰত ভিৰ কৰিছে মহানগৰবাসীয়ে। প্ৰতিজন লোকেই পছন্দ অনুসৰি ক্ৰয় কৰিছে ভোগৰ সামগ্ৰী। প্ৰতি বছৰে এইদৰে মহানগৰবাসীক ভোগালীৰ সোৱাদ দিবলৈ ৰাজ্যৰ ভিন্ন প্ৰান্তৰ পৰা আহে ভোগৰ সামগ্ৰী। মহানগৰীৰ গণেশগুৰি বজাৰতো ভোগালীৰ বতৰত উভৈনদী হৈ পৰিছে লাড়ু–পিঠা, চিৰা–দৈ, গুৰ আদি সুস্বাদু খাদ্য সম্ভাৰ।
