পাকঘৰত জুই! LPG চিলিণ্ডাৰৰ দাম একেবাৰতে বাঢ়িল ২৫টকা, পেট্ৰ’ল–ডিজেলৰ মূল্যও বৃদ্ধি, জানক নতুন নিৰিখ

মধ্যবিত্তক মাধমাৰ শোধাই আকৌ এবাৰ বাঢ়িল ৰন্ধন গেছৰ চিলিণ্ডাৰৰ দাম। একেবাৰতে ২৫টকা বাঢ়িল চিলিণ্ডাৰৰ মূল্য।

বৃহস্পতিবাৰে গুৱাহাটীবাসীৰ কাৰণে ১৪.২ কিলোগ্ৰামৰ ৰাজসাহাৰ্যবিহীন চিলিণ্ডাৰৰ মূল্য হৈছেগৈ ৭৪৩ টকা। মন কৰিবলগীয়া যে ইয়াৰ লগে লগে, ডিচেম্বৰৰ পৰা ফেব্ৰুৱাৰীলৈ গেছ চিলিণ্ডাৰৰ দাম ১০০ টকা বাঢ়িল। লক্ষ্যণীয় যে দিল্লীত এই মুহূর্তত গেছৰ দাম ৭১৯ টকা, মু্ম্বাইত ৭১৯ টকা আৰু চেন্নাইত ৭৩৫ টকা।

আনহাতে এইবাৰৰ বাজেটৰ ঘোষণাত কেন্দ্ৰই পেট্ৰ’লৰ প্ৰতি লিটাৰত ২টকা আৰু ডিজেলৰ প্ৰতি লিটাৰত ৪টকা চেচ লগোৱাৰ কথা ঘোষণা কৰি আশ্বাস দিছিল যে ইয়াৰ ফলত দামত প্ৰভাৱ নপৰে! কিন্তু বাজেট ঘোষণাৰ ৭২ ঘণ্টাৰ ভিতৰতে বাঢ়িল পেট্ৰ’ল–ডিজেলৰ মূল্য।

আজি অৰ্থাৎ ৪ ফেব্রুৱাৰীত গুৱাহাটীত পেট্ৰ’লৰ লিটাৰত ৬৩ পইচা বাঢ়ি দাম হৈছেগৈ ৮৯.৬৬ টকা। ডিজেলৰ প্ৰতি লিটাৰত ৬৫ পইচা বাঢ়ি লিটাৰত মূল্য হৈছেগৈ ৮৩.৩৫টকা। ইয়াৰ বিপৰীতে দিল্লীত পেট্র’লৰ দাম বাঢ়িছে লিটাৰত ৩৫ পইচা। দিল্লীত পেট্ৰ’লৰ আজি নতুন দাম ৮৬.৬৫ টকা প্রতি লিটাৰ। ডিজেলৰ দামো লিটাৰত ৩৫ পইচা বাঢ়ি প্ৰতি লিটাৰত ৭৬.৮৩ টকা হৈছেগৈ।