ভাৰতবৰ্ষই স্বাধীনতা লাভ কৰাৰ দুবছৰ পিছতে কাৰগিলত শ্বহীদ হোৱা প্ৰথমগৰাকী বীৰ জোৱানৰ স্মৃতি হয়তো এতিয়া সকলোৰে বাবে বিস্মৃতিৰ গৰ্ভত। ১৯৪৯ চনৰ ৬ অক্টোবৰ। এই দিনটোতে আজিৰ পৰা ৭২ বছৰ আগৰ এক সংঘর্ষপীড়িত সময়ত চিৰবৈৰী পাকিস্তানক পদানত কৰি দেশৰ সন্মান অক্ষুণ্ণ ৰাখিবলৈ অসীম সাহসিকতাৰে দেশৰ বাবে প্ৰাণ উছৰ্গা কৰি শ্বহীদ হৈছিল বীৰ প্রসৱিনী অসম মাতৃৰ সন্তান পাৰ্বতিচৰণ দাস। ইতিহাসৰ পাতত ১৯৪৯ চনৰ ৬ অক্টোবৰৰ দিনটোৰ সেই স্মৃতি আজিও সজীৱ হৈ আছে। ভাৰতীয় সৈন্য বাহিনীৰ ৪/১১ নং গোর্খা ৰাইফলছ বেটেলিয়নৰ লেফটেনেন্ট আছিল পার্বতিচৰণ দাস। সিন্ধু নৈৰ পানীয়ে আঁকোৱালি লৈছিল এই বীৰ জোৱানৰ মৃতদেহ।
এই বীৰ অসম সন্তানৰ আত্মত্যাগৰ প্ৰতি সন্মান জনাই তদানীন্তন প্রধানমন্ত্ৰী জৱাহৰলাল নেহৰুৱে নিজ হাতেৰে সমবেদনা পত্ৰ লিখি ১৯৫০ চনৰ ১৯ ছেপ্টেম্বৰত প্ৰেৰণ কৰিছিল পাৰ্বতিচৰণ দাসৰ পিতৃ পাঠশালা নিৱাসী বলিৰাম দাসলৈ। গোর্খা ৰেজিমেণ্টৰ লেফটেনেণ্ট কর্ণেল এইচ পি যাদৱেও পাৰ্বতিচৰণ দাসৰ আত্মত্যাগ আৰু বীৰত্বৰ বৰ্ণনাৰে তেওঁৰ আৰক্ষী পিতৃলৈ পত্ৰ প্ৰেৰণ কৰিছিল। কিন্তু তাৰ পিছত পাহৰণিৰ গৰ্ভত হেৰাই থাকিল বীৰ শ্বহীদ পাৰ্বতি চৰণ দাসৰ বীৰত্বৰ কাহিনী।কাশ্মীৰক কেন্দ্ৰ কৰি ভাৰত আৰু চিৰবৈৰী পাকিস্তানৰ মাজত চলি থকা তীব্র উত্তেজনা, ভয়াৱহ সংঘর্ষৰে জৰ্জৰিত এক জ্বালামুখী সময় আছিল সেয়া। এই সময়ছোৱাৰ মাজতে ১৯৪৯ চনৰ ৬ অক্টোবৰত লগত দুজন সংকেতপ্ৰেৰক (ছিগনেলাৰ) লৈ সিন্ধু নদীৰ সোঁপাৰত গৈ উপস্থিত হয় গোৰ্খা ৰেজিমেন্টৰ লেফটেনেন্ট পার্বতিচৰণ দাস।
উদ্দেশ্য কাৰগিল অঞ্চলৰ সিন্ধু নদীৰ বাঁওপাৰে থকা কুলিচাং গাঁৱত থকা সেনাবাহিনীৰ হেড কোৱাৰ্টাৰৰ সৈতে টেলিফোন সংযোগ স্থাপন কৰা। তাৰ আগদিনাই তেওঁ গৈ ঠাইডোখৰ ভালদৰে পৰ্যবেক্ষণ কৰি আহিছিল। ইতিমধ্যে দুর্গম পর্বত, সংকীর্ণ গিৰিপথ, কোবাল পৰ্বতীয়া নৈ, বিভিন্ন বিপদসংকুল পৰিৱেশত নিষ্ঠা আৰু সাহসিকতাৰে কৰ্তব্য সমাপন কৰি সুনাম অৰ্জন কৰিছিল।
ছয় অক্টোবৰৰ পুৱা লেফটেনেন্ট দাসে টেলিফোনৰ 'কেবল' (তাঁৰ) নৈখনৰ সিপাৰে দলিয়াবলৈ আপ্রাণ চেষ্টা কৰে যদিও ব্যৰ্থ হয়। জৰুৰী কাম কৰিবই লাগিব, তাকো যথাসম্ভব শীঘ্ৰে কোন মুহূৰ্ত্তত শত্রুসেনাই আক্রমণ কৰে একো ঠিকনা নাই। গতিকে নিজে সিন্ধু নৈৰ পানীত নামি পৰিল তেওঁ। কোবাল সোঁতকো উপেক্ষা কৰি তেওঁ সিপাৰলৈ গৈ থাকিল। নৈখনৰ তিনি চতুর্থাংশ তেওঁ অতিক্ৰম কৰিলে যদিও তাৰ পিছত তেওঁ আৰু আগবাঢ়িব নোৱাৰিলে। তাৰ পৰাই তেওঁ উভতি আহিব বিচাৰিলে। কিন্তু উভতি আহি নদীৰ সোঁমাজ পাওঁতেই সিন্ধু নদীৰ কোবাল সোঁতে পাৰ্বতি চৰণ দাসক তললৈ লৈ যাব ধৰে। তেওঁ সহায়ৰ বাবে চিঞৰিলে, কিন্তু কামত নাহিল। লগত থকা ছিগনেলাৰ দুজনে তেওঁক পানীৰ কোবাল সোঁতৰ পৰা উদ্ধাৰ কৰিব নোৱাৰিলে। ইয়াৰ পিছত তেওঁক বিচাৰি দুদিন ধৰি নদীৰ বিভিন্ন স্থানত সন্ধান চলোৱা হ'ল যদিও একো ফল পোৱা নগ'ল। চিৰদিনৰ বাবে হেৰাই গ'ল বজালী জিলাৰ পাঠশালা নগৰৰ বীৰ সৈনিক পাৰ্বতিচৰণ দাস।
কিন্তু দুর্ভাগ্যজনকভাবে এইদৰে অসমীয়া সৈনিকৰ স্মৃতি সম্পৰ্কীয় কোনোধৰণৰ তথা সংৰক্ষণৰ ব্যৱস্থা আজিলৈকে কোনো এখন চৰকাৰেই নকৰিলে। ১৯২৩ চনৰ ফেব্ৰুৱাৰী মাহত জন্মগ্ৰহণ কৰা পাৰ্বতিৰণ দাসে ১৯৪০ চনত গুৱাহাটী কটন কলেজিয়েট হাইস্কুলৰ পৰা মেট্ৰিকুলেচন পৰীক্ষাত দ্বিতীয় বিভাগত উত্তীৰ্ণ হয়। ১৯৪২ চনত কটন কলেজৰ পৰা বিজ্ঞান শাখাত ইণ্টাৰমিডিয়েট পৰীক্ষাতো উত্তীৰ্ণ হয়। ইয়াৰ পিছত ১৯৪৩ চনত বাংগালোৰৰ মিলিটেৰী অফিচাৰ্ছ ট্রেইনিং স্কুলত ভৰ্তি হৈ ট্ৰেইনিঙত উত্তীৰ্ণ হয়। | আৰু কলিকতাৰ পৰা বি এ পাছ কৰে। ভাৰত স্বাধীন হোৱাৰ আগে আগে ১৯৪৬ চনত তেওঁ কলিকতাত মকৰল হোৱা সেনাবাহিনীৰ ৪/১১ গোর্খা ৰাইফলছ বেটেলিয়নত যোগদান কৰে।
১৯৪৮ চনত কাশ্মীৰ ৰক্ষাৰ হেতু গোর্খা ৰেজিমেণ্টৰ প্ৰয়োজন হোৱাত এই ৰেজিমেণ্টৰ ছিগনেল অফিচাৰ হৈ তেওঁ কাশ্মীৰত উপস্থিত হয়। তাৰ পিচত বীৰৰ দৰে মৃত্যুবৰণ কৰে তেওঁ। ২৬ বছৰ বায়সতে দেশৰ হকে প্রাণাহুতি দিয়া এই ৰীৰ সৈনিকৰ স্মৃতি যেন এতিয়া পাহৰণিৰ গৰ্ভত। তেওঁৰ পাঠশালাৰ ঘৰত থকা ভাগিন বোৱাৰী দীপালী দাসে এই বীৰজনাৰ সকলো তথ্য, জৱাহৰলাল নেহৰুৰ পৰা লাভ কৰা শোক বাৰ্তা আদি বুকুত সাবটি এটা পৰম আশা লৈ জীয়াই আছে।
এই আশা— মৰণোত্তৰভাৱে পাৰ্বতিচৰণ দাসক পৰম বীৰ চক্ৰ প্ৰদানেৰে ৰাষ্ট্ৰীয় সন্মান দিয়াৰ আশা। পাৰ্বতিচৰণ দাসৰ এটা প্ৰতিমূৰ্তি স্হাপন কৰাৰ আশা। তেওঁৰ এই আশা পূৰণ হ'বনে? এয়া এক গুৰুত্বপূর্ণ প্রশ্ন। জানিব পৰা মতে, গোৰ্খা ৰেজিমেন্টে পাৰ্বতি চৰণ দাসৰ সোঁৱৰণত প্ৰতি বছৰে ফুটবল খেল অনুষ্ঠিত কৰি অহাৰ উপৰি শেহতীয়াভাৱে পাৰ্বতি চৰণ দাসৰ প্ৰতিমূৰ্তি স্হাপনৰ বাবে পাঠশালাত ভূমিৰ সন্ধান কৰি আছে। আনহাতে পাঠশালা আঞ্চলিক ছাত্র সন্থাৰ সভাপতি ধৃতিৰাজ তালুকদাৰে পাৰ্বতি চৰণ দাসৰ স্মৃতি চিৰযুগমীয়া কৰাৰ বাবে আজি পাৰ্বতী চৰণ দাসৰ পাঠশালাৰ পৰিয়ালটোৰ গৃহত উপস্থিত হৈ ৰাজ্য চৰকাৰক পাঠশালাত পাৰ্বতি চৰণ দাসৰ প্ৰতিমূৰ্তি নিৰ্মাণ কৰি সেই প্ৰতিমূৰ্তি ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মাৰ হাতেৰে উন্মোচন কৰাৰ বাবে আহবান জনায়।
