আপুনি গুগল পে’ ব্যৱহাৰ কৰে নেকি? সাৱধান! গুগল পে' ব্যৱহাৰ কৰি সৰ্বস্বান্ত হ'ল এইগৰাকী মহিলা!

ধন আদান প্ৰদানৰ ক্ষেত্ৰত গুগল পে' বা আন পে’মেণ্ট এপ্লিকেচন ব্যৱহাৰ কৰে নেকিআপুনি? যদি এনেধৰণৰ এপ্লিকেচন ব্যৱহাৰ কৰে তেন্তে সাৱধান হওক! 

হেকাৰে টেলিফোন কৰি এটিএম কাৰ্ডৰ সংখ্যা অথবা পাছৱৰ্ড বিচৰা পদ্ধতি এতিয়া আউটডেটেড৷ এইবাৰ হেকাৰৰ নতুন কৌশল গুগল পে'ৰ সহায়ত আপোনাৰ কষ্টোপাৰ্জিত সমস্ত জমা ধন বেংক একাউণ্টৰ পৰা সৰকাই নিয়া৷

সৰ্থেবাৰীত এগৰাকী মহিলাৰ পৰা হেকাৰে ৭০ হাজাৰ টকা লুটি লৈ যোৱাৰ পিছতে পোহৰলৈ আহিছে এই কথা। বিজু ৰাণী বৰ্মণ নামৰ ভুক্তভোগী মহিলাগৰাকীয়ে অভিযোগ কৰা অনুসৰি, যোৰহাট চিকিৎসা মহাবিদ্যালয়ত কোৰোণাৰ চিকিৎসাত ব্ৰতী হৈ থকা চিকিৎসক স্বামীলৈ গুগল পে' যোগে প্ৰেৰণ কৰিছিল ৭ হাজাৰ টকা। কিন্তু বেংক একাউণ্টৰ পৰা ১৪ হাজাৰ টকা কাটি লৈ যায় গুগল পে'ই৷

এই সম্পৰ্কে অভিযোগ দিবলৈকে গুগল পে'ৰ কাষ্ট’মাৰ কেয়াৰৰ ফোন নম্বৰত ফোন কৰি অভিযোগ দিয়ে মহিলাগৰাকীয়ে। মহিলাগৰাকীয়ে ফোন কৰি গুগল পে'ত অভিযোগ দিয়াৰ পিছতে তেওঁৰ পৰা একাউণ্টৰ সকলো তথ্য সংগ্ৰহ কৰি মহিলাগৰাকীৰ পৰা সৰকাই নিয়ে ৭১ হাজাৰ টকা। 

এই ঘটনাৰ পিছতে মহিলাগৰাকীয়ে ইতিমধ্যে ষ্টেট বেংকৰ সৰ্থেবাৰী শাখাত অভিযোগ দাখিলৰ লগতে সৰ্থেবাৰী আৰক্ষী থানাত ৰুজু কৰিছে গোচৰ৷