Poita Bhat : সাধাৰণ ভাততকৈ বহু গুণ উপকাৰী অসমীয়াৰ প্ৰিয় পইতা ভাত, গৱেষণাইও কৰিলে প্ৰমাণ!

কথাতে কয়- পইতা ভাতৰ জল, তিনি পুৰুষৰ বল। অতীজৰে পৰা প্ৰচলিত হৈ অহা এই প্ৰবচন এতিয়া কেৱল এক লোক বিশ্বাসেই হৈ থকা নাই, এইয়া কাগজে-কলমে প্ৰমাণ কৰিলে অসম কৃষি বিদ্যালয়ৰ এক গৱেষণাই। অসম কৃষি বিশ্ববিদ্যালয়ৰ জৈৱ প্ৰযুক্তি বিভাগৰ অধ্যাপক মধুমিতা বৰুৱাই গৱেষণা কৰি বিচাৰি উলিয়াইছে পইতা ভাত (Poita Bhat)ৰ উপকাৰিতাসমূহ। মধুমিতা বৰুৱাৰ এই এই গৱেষণাৰ বিষয়ে প্ৰকাশ পাইছে এছিয়ান জাৰ্ণাল অৱ কেমেষ্ট্ৰী (Asian Journal of Chemistry)ত। এই প্ৰতিবেদনতে দেখা গৈছে যে প্ৰচলিত প্ৰবচনৰ সৈতে আখৰে আখৰে যেন মিলি গৈছে মধুমিতা বৰুৱাৰ গৱেষণাৰ তথ্য। সচাকৈ পইতা ভাতৰ তুলনা নাই।

মধুমিতা বৰুৱাৰ গৱেষণা মতে ১০০ গ্ৰাম সাধাৰণ ভাতত আইৰণৰ পৰিমাণ থাকে ৩ গ্ৰাম, কিন্তু সেই একেখিনি ভাত যদি পইতা ভাত কৰি পেলোৱা হয় তেন্তে তাত আইৰণৰ পৰিমাণ বাঢ়ি হয় ৭৩.৯ গ্ৰাম। একেদৰেই পইতা ভাতত কেলছিয়াম, মেগনেছিয়ামৰ পৰিমাণো বাঢ়ি যায় সাধাৰণ ভাতৰ তুলনাত। কিন্তু এই যাদু সম্ভৱ কিদৰে?

গৱেষণাত পোৱা মতে ভাত পইতা হ'লে ফাৰ্মেণ্টেচনৰ কাৰণে ভাতৰ অপুষ্টিকৰ উপাদানসমূহৰ পতন হয় আৰু পুষ্টিকৰ গুণসমূহৰ সলনি হয় আৰু অধিক পুষ্টিকৰ উপাদানসমূহ সুলভ হৈ পৰে। যাৰ ফলত পইতা ভাতত উপকাৰী খনিজাত উপাদানসমূহ বৃদ্ধি পায়।

এনেদৰে আইৰণৰ পৰিমাণ বাঢ়ি যোৱাৰ ফলত দেহত অক্সিজেনৰ পৰিমাণ বাঢ়ি যায়। কেলছিয়মাৰ পৰিমাণ বাঢ়ি যোৱাত পইতা ভাতে দেহৰ হাড়সমূহ মজবুত কৰি তোলে।

তদুপৰি পইতা ভাতত যি লেক্টিক এচিড বেক্টেৰিয়া থাকে সি হজম শক্তি বৃদ্ধি কৰাত সহায় কৰে। কিন্তু এটা কথাত সাৱধান হোৱা জৰুৰী যে পইতা ভাতত ব্যৱহাৰ কৰা পানী যদি বিশুদ্ধ নহয় তেন্তে নানা সমস্যাৰ সৃষ্টি কৰিব পাৰে।