পৱিত্ৰ অম্বুবাচী উপলক্ষে আজি সন্ধিয়া আলোকেৰে সজাই তোলা হ'ল শক্তিপীঠ মা কামাখ্যা মন্দিৰ। নিবৃত্তিৰ দিনা পৰম্পৰাগতভাৱে ৰীতি-নীতিৰে অম্বুবাচীৰ নিয়ম সমাপন কৰাৰ পাছত এনেদৰে নিশা সজাই তোলা হৈছে নীলাচলৰ বুকু। ২২ জুনৰ বিয়লিৰ পৰা অম্বুবাচীৰ বাবে বন্ধ আছিল মা কামাখ্যা মন্দিৰৰ দুৱাৰ। ২৬ জুনৰ পুৱা ২ বাজি ২৯ মিনিটত নিবৃত্তি হোৱাৰ পাছত খোলা হয় কামাখ্যাৰ দুৱাৰ। অম্বুবাচী উপলক্ষে শনিবাৰে পুৱাই কামাখ্যা মন্দিৰ দৰ্শন কৰে মুখ্যমন্ত্ৰী হিমন্ত বিশ্ব শৰ্মাই। পত্নী ৰিণিকী ভূঞা শৰ্মাৰ সৈতে পুৱা মা কামাখ্যাৰ চৰণত সেৱা জনাই আশীৰ্বাদ লয় মুখ্যমন্ত্ৰীয়ে। এইবাৰ কোভিড সংক্ৰমণৰ বাবে শক্তিপীঠত আয়োজন কৰা নহ'ল বিখ্যাত অম্বুবাচী মেলা। একেৰাহে দ্বিতীয়বাৰৰ বাবে বাতিল হৈছে অম্বুবাচী মেলা। যোৱা ভছৰো কোৰোণাৰ বাবেই অম্বুবাচী মেলা বাতিল হৈছিল। কোৰোণা সংক্ৰমণৰ বাবে এইবাৰ ভক্তৰ বাবে বন্ধ আছিলকামাখ্যা মন্দিৰৰ দুৱাৰ। মন্দিৰৰ পুৰোহিতে কেৱল ৰীতি-নীতি মানি অম্বুবচীৰ বৈদিক পৰম্পৰা ৰক্ষা কৰে।
