ব্ৰহ্মপুত্ৰই নহয়, জল পৰিবহণ বিভাগে কন্দুৱাই আহিছে ৰাজ্যবাসীক । ব্ৰহ্মপুত্ৰৰ জাইকা দলঙত হোৱা নৌকা দুৰ্ঘটনাৰ সেই চকুলোৱে এতিয়াও সেমেকাই ৰাখিছে বহু পৰিয়ালক । ২০১৮ চনৰ পাঁচ ছেপ্তেম্বৰৰ সেই কৰুণ ঘটনাত কটন বিশ্ববিদ্যালয়ৰ দুগৰাকী ছাত্ৰীৰ কৰুণ মৃত্যুৰ লগতে নিখোজ হৈ আছে বহুজন । ব্ৰহ্মপুত্ৰৰ জাইকা দলঙৰ দুৰ্ঘটনাৰ পিছৰ তিনিটা বছৰত জল যাতায়তৰ নহ'ল কোনো শুধৰণি । যাৰ বাবে পুনৰ কটনৰ পৰাই ডিগ্ৰীধাৰী ছাত্ৰী তথা অধ্যাপিকা পৰিমিতা দাসৰ কৰুণ মৃত্যুৰ খবৰে মৰ্মাহতে কৰিলে ৰাজ্যবাসীক । তিনিটা বছৰৰ পিছত পুনৰ সেই ২০১৮ৰ ছবিসমূহ সজীৱ কৰি তুলিলে পৰিমিতাৰ মৃত্য়ুৱে। কটনৰে ছাত্ৰী। জ্ঞানৰ পোহৰেৰে মাজুলী যোৰহাট জাতিষ্কাৰ কৰা পৰিমিতাৰ সপোন সপোন হৈয়ে ৰ'ল । একেই বিভাগীয় মন্ত্ৰী ,জল পৰিবহন বিষয়া, অভিযন্তা ,কিন্তু চিন্তাধাৰাৰ নহ'ল কোনো পৰিৱৰ্তন । চৰকাৰ অবহেলাত বেআইনী ভটভটী চলাই আহিছিল অসাধু চক্ৰই । যাৰবাবে মুকলি জলপথত নিয়ন্ত্ৰণ হেৰাল দুই চালকৰ । আকস্মিক সুৰক্ষাৰ নামত থকা চৰকাৰী নিয়ম তৰাং নদীত বুৰ গ'ল । অংকিতা দাসৰ মাতৃয়ে নিমাতীৰ ঘটনাৰ খবৰ শুনি অসুস্থ হ'ল । পিতৃয়ে খবৰ কাকতখনকে মেলিবলৈ সাহস গোটাব পৰা নাই । অংকিতাৰ পিতৃ অৰূপ বৰুৱাই এতিয়া ক্ষোভ উজাৰে কাক । সকলো ক্ষেত্ৰতে দৃঢ়মত দিয়া মানুহজন আজি এবুকু দুখত ভাগৰি পৰিছে । মাজপানীৰ অসহায় লোকৰ দৰে ককবকাই থকা অৰূপ বৰুৱা মুখ্য মন্ত্ৰী হিমন্ত বিশ্ব শৰ্মাৰ ওচৰত আশাবাদী হৈছে । মুখ্য মন্ত্ৰীয়ে পাৰিব জল যাতায়াতৰ স্থায়ী সমাধান উলিয়াব । থোকাথুকি মাতেৰেই শ্ৰদ্ধাঞ্জলি যাচিলে পৰিমিতা দাসক । বিষয়া অভিযন্তা দুজনমানৰ চাকৰিৰ পৰা নিলম্বন কৰিলেই সমাধান ওলাবনে ? ২০১৮চনৰ গুৱাহাটী দুৰ্ঘটনাৰ পিছত, ২০২১ৰ নিমাতীঘাট দুৰ্ঘটনাৰ পিছত, এতিয়া উন্নত হ'বনে জল যাতায়াত ? ভৰ বাৰিষা নিৰাপদ জলযাত্ৰা কৰিব পাৰিবনে ৰাজ্যবাসীয়ে ?
