Rock Cut Temple at Maibang : ডিমাচাসকলৰ ঐতিহ্যময় ৰণচণ্ডী মন্দিৰে পালে নতুন ৰূপ, হ'ব পৰ্যটনৰ অন্যতম আকৰ্ষণস্থলী

ষোল শতিকাত আহোমসকলৰ সৈতে যুদ্ধত পৰাস্ত হৈ ডিমাচাসকলে ডিমাপুৰৰ পৰা আহি বৰ্তমান ডিমা হাছাও জিলাৰ মাইবাঙৰ মাহুৰ নদীৰ পাৰত ৰাজধানী স্থাপন কৰিছিল। মাইবাঙত নতুনকৈ ৰাজধানী নিৰ্মাণ কৰাৰ উপৰি হিড়িম্ব ৰাজ্য শাসন কৰিছিল ডিমাচা ৰজাসকলে।

তেতিয়া ডিমাচা ৰজা মেঘনাৰায়ণে মাইবাঙৰ মাহুৰ নদীৰ পাৰত এটা শিলেৰে এটা মন্দিৰ স্থাপন কৰিছিল, যাক ৰণচণ্ডী মন্দিৰ বুলি কোৱা হয়। আনহাতে এয়া এক পাথৰ ঘৰ হিচাপে অধিক পৰিচিত। কিন্তু ডিমাচা ৰাজত্বৰ ঐতিহ্য তথা স্মৃতিচিহ্নক সংৰক্ষণ তথা চোৱাচিতাৰ বাবে পাৰ্বত্য প্ৰশাসন বা চৰকাৰৰ প্ৰত্নতত্ত্ব বিভাগে তেনে কোনো ব্যৱস্থা লোৱা পৰিলক্ষিত হোৱা নাই, যাৰ বাবে পৰিত্যক্ত অৱস্থাত আছিল একপাথৰৰ ঘৰ। তাত যোৱাৰ কোনো ভাল বাট-পথ নাছিল।

তেনে পৰিস্থিতিত বিজেপি শাসিত উত্তৰ কাছাৰ পাৰ্বত্য স্বায়ত্তশাসিত পৰিষদৰ মুখ্য কাৰ্যবাহী বিষয়া দেৱলাল গাৰ্লোচাই ডিমাচা ঐতিহ্যক সংৰক্ষণ তথা সজাই-পৰাই তোলাৰ বাবে ব্যৱস্থা হাতত লয় আৰু যোৱা দুটা বছৰৰ ভিতৰত ৰণচণ্ডী মন্দিৰক নতুন ৰূপ দিয়াত সক্ষম হয়। নতুন বছৰৰ ৫ জানুৱাৰী তাৰিখে ৰণচণ্ডী মন্দিৰৰ আনুষ্ঠানিক দ্বাৰো উদঘাটনৰ কথা আছিল। কিন্তু তেনে কোনো কাৰণত এয়া স্থগিত ৰখা হয় আৰু অহা ১৩ জানুৱাৰী তাৰিখে দ্বাৰ মুকলি অনুষ্ঠান অনুষ্ঠিত হ'ব।

আচলতে মাইবাং এটা ডিমাচা শব্দ, যাৰ অৰ্থ হৈছে ধানৰ ভঁৰাল। মাই অৰ্থ ধান আৰু বাং অৰ্থ বেচি। মাইবাঙত ডিমাচা ৰাজত্বৰ বহুতো স্মৃতি চিহ্নৰ উপৰি ৰাজবাড়িৰ ধ্বংসাৱশেষ বৰ্তমান। ইতিমধ্যে মাইবাং একপাথৰৰ ঘৰ বা ৰণচণ্ডী মন্দিৰ চৌহদ নতুন ৰূপ লাভ কৰিবলৈ সক্ষম হৈছে। চৌদিশে পোহৰৰ ব্যৱস্থা কৰাৰ উপৰি ডিমাচা ৰজা, মহাৰজা, মন্ত্ৰী, সেনাপতি, পুৰোহিত আদিৰ মূৰ্তি স্থাপন কৰা হৈছে। লগতে এখন আটকধুনীয়া তোৰণ নিৰ্মাণ কৰা হৈছে। অৰ্থাৎ মাইবাং ৰণচণ্ডী মন্দিৰ চৌহদত উপস্থিত হ'লে গোটেই ডিমাচা ইতিহাস সহজতে অনুধাৱন কৰা সম্ভৱ হ'ব।

তথ্য অনুসৰি অহা ১৩ আৰু ১৪ জানুৱাৰী দুদিনীয়া কাৰ্যসূচীৰে অনুষ্ঠিত হ'ব শুভাৰম্ভ অনুষ্ঠান। য'ত পাৰ্বত্য জিলাৰ উপৰি ৰাজ্যৰ বিভিন্ন প্ৰান্তৰ পৰা ডিমাচা ৰাইজ গোট খাব। অন্ততঃ ২০ হেজাৰ ৰাইজ গোট খোৱাৰ সম্ভাৱনা আছে। লগতে ২০০০ যুৱতীয়ে বাইডিমা নৃত্য আৰু ৫০০ গৰাকী যুৱকে খ্ৰাম আৰু মুৰি বজাব। এতিয়া একপাথৰৰ ঘৰৰ নতুন ৰূপ পাৰ্বত্য পৰ্যটনৰ অন্যতম আকৰ্ষণ হোৱাটো নিশ্চিত।