সম্বন্ধীয় ভনীয়েকৰ অন্নপ্ৰাশনলৈ যোৱা সুফলা আকৌ ঘূৰি নাহিল ঘৰলৈ, মাজ ৰাস্তাৰ পৰাই কাঢ়ি লৈ গ’ল নিষ্ঠুৰ নিয়তিয়ে

সম্বন্ধীয় ভগ্নীৰ অন্নপ্ৰাশনলৈ গৈছিল সুফলা অধিকাৰী নামৰ এগৰাকী যুৱতী। কিন্তু অন্নপ্ৰাশনৰ পৰা ঘূৰি আহি থাকোটে হঠাত্‍ দুৰ্ঘটনাত পতিত হৈ মৃত্যুক সাৱটিলে যুৱতীগৰাকীয়ে।

বুধবাৰে গোলকগঞ্জৰ গাইখাওৱাত থকা মাহীয়েকৰ ছোৱালীৰ অন্নপাশনৰ পৰা ঘূৰি অহাৰ সময়তে সংঘটিত হৈছিল এই ঘটনা। মটৰ চাইকেলেৰে ঘৰলৈ আহি থকা অৱস্থাত হঠাত্‍ বাইকৰ পৰা পৰি গৈছিল সুফলা।

দুৰ্ঘটনাত গুৰুতৰ ভাবে আহত হোৱা সুফলাক প্ৰথমে ধুবুৰীৰ এখন স্থানীয় চিকিত্‍সালয়ত ভৰ্তি কৰোৱা হৈছিল যদিও পিছত উন্নত চিকিত্‍সাৰ বাবে গুৱাহাটী মেডিকেল কলেজত ভৰ্তি কৰোৱা হৈছিল।

কিন্তু মেডিকেল কলেজতে মৃত্যুক সাৱটি লয় সুফলাই।

ধুবুৰীৰ পাগলাহাট আৰক্ষী চকীৰ অন্তৰ্গত কাছাখান গাঁৱৰ সুফলা অধিকাৰীৰ শেষকৃত্য আজি এক শোকাকুল পৰিৱেশৰ মাজত সম্পন্ন হয়।ধুবুৰীৰ পাগলাহাটত সৰ্বত্ৰ শোকৰ ছাঁ। সামাজিক কাম কাজত আগভাগ লোৱা উচ্চ শিক্ষিতা ছোৱালী সুফলা আকস্মিক ভাবে মৃত্যু মুখত পৰাত সকলোৱে মৰ্মাহত হৈ পৰিছে। পাগলাহাটৰ বালাসী শ্মশানত শেষকৃত্য সম্পন্ন কৰা হয়। উল্লেখ্য যে, গোলকগঞ্জ চিলাৰায় মহাবিদ্যালয়ৰ পৰা এইবেলি সুফলাই সুখ্যাতিৰে বিএ পাছ কৰে। সকলোৰে লগত মিলা-প্ৰীতিৰে থাকি ভাল পোৱা আৰু সামাজিক কামত আগৰণুৱা সুফলাৰ এনেদৰে আকস্মিক মৃত্যুত অঞ্চলটোত শোকৰ ছাঁ পৰিছে।