নামঘৰত আঁঠু লৈ মাজুলীত মনোনয়ন পত্ৰ দাখিল কৰিলে মুখ্যমন্ত্ৰী সৰ্বানন্দ সোণোৱালে

মঙলবাৰে মাজুলীত মনোনয়ন পত্ৰ দাখিলৰ দিনা অতি আত্মবিশ্বাসী ৰূপত দেখা গ’ল মুখ্যমন্ত্ৰী সৰ্বানন্দ সোণোৱালক। মনোনয়ন পত্ৰ দাখিল কৰিবলৈ যোৱাৰ পূৰ্বে মুখ্যমন্ত্ৰীগৰাকীয়ে সেৱা জনাই আশীৰ্বাদ লয় গড়মুৰৰ শান্তিপুৰ নামঘৰত।

ইয়াৰ পিছতে মুখ্যমন্ত্ৰীগৰাকীয়ে আন এক স্থানত ভকতসকলৰ সৈতে নাম-কীৰ্ত্তনত অংশ গ্ৰহণ কৰি ৰাইজৰ আশীৰ্বাদ লয়।

ইয়াৰ পিছতে সৰ্বানন্দ সোণোৱালে গড়মুৰৰ নীলকণ্ঠ মন্দিৰলৈ যায়। মুখ্যমন্ত্ৰীগৰাকীয়ে ধূপ-দীপ-নৈবেদ্য আগবঢ়াই সেৱা লয় মন্দিৰত।

ইয়াৰ পিছতে মাজুলীৰ অগনন সমৰ্থকক লগত লৈ মুখ্যমন্ত্ৰীগৰাকীয়ে ৰাজপথেৰে সমদল কৰি আগবাঢ়ে মাজুলীৰ উপায়ুক্ত কাৰ্যালয়লৈ মনোনয়ন পত্ৰ দাখিল কৰিবলৈ।

মাজুলীৰ ৰিটাৰ্নিং বিষয়াৰ হাতত মনোনয়ন পত্ৰ দাখিল কৰে মুখ্যমন্ত্ৰী সৰ্বানন্দ সোণোৱালে।

ইয়াৰ পিছতে মুখ্যমন্ত্ৰীগৰাকীক অগনন ৰাইজে ঢোলে-ডগৰে আদৰি নিয়ে গড়মুৰ মিনি ষ্টেডিয়ামত অনুষ্ঠিত এক বিশাল জনসভালৈ।

এই জনসভাত উপস্থিত থাকে কেন্দ্ৰীয় মন্ত্ৰী জিতেন্দ্ৰ সিং, বিজেপিৰ অসমৰ প্ৰভাৰী জয় পাণ্ডা, বিজেপিৰ ৰাজ্যিক সভাপতি ৰঞ্জিত দাস, মন্ত্ৰী ড০ হিমন্ত বিশ্ব শৰ্মা, মন্ত্ৰী তথা অগপ সভাপতি অতুল বৰা, মন্ত্ৰী কেশৱ মহন্ত, মন্ত্ৰী নৱ দলে , ইউপিপিএলৰ সভাপতি প্ৰমোদ বড়ো , সন্মিলিত গণশক্তিৰ সভাপতি পৰমানন্দ চাৰিঙিয়া, সাংসদ প্ৰদান বৰুৱা।