CM Visits Flood-Hit Areas : বন্যাৰ্তৰ কাষত মুখ্যমন্ত্ৰী, কামৰূপ আৰু দৰং জিলাৰ বান পৰিস্থিতি পৰ্যবেক্ষণ, লগত গ'ল কেইবাগৰাকীও বিধায়ক

মুখ্যমন্ত্ৰী ড০ হিমন্ত বিশ্ব শৰ্মাই আজি বানপীড়িত কামৰূপ আৰু দৰং জিলা পৰিদৰ্শন কৰে। মুখ্যমন্ত্ৰীগৰাকী বান-পৰিস্থিতিৰ বুজ লয় আৰু পৰ্যাপ্ত চৰকাৰী সহায়ৰ নিৰ্দেশনাৰে বানপীড়িত লোকসকলৰ সৈতে মত বিনিময় কৰে। মুখ্যমন্ত্ৰীগৰাকী বান-পৰিস্থিতিৰ বুজ লয় আৰু পৰ্যাপ্ত চৰকাৰী সহায়ৰ নিৰ্দেশনাৰে বানপীড়িত লোকসকলৰ সৈতে মত বিনিময় কৰে।

মুখ্যমন্ত্ৰীগৰাকীয়ে ৰঙিয়া চহৰত বিৰাজ কৰা বান পৰিস্থিতিৰ বুজ লোৱাৰ লগতে চহৰখনৰ ফাতিমা কনভেন্ট স্কুলত আশ্ৰয় লোৱা বানপীড়িত লোকসকলক সাক্ষাত কৰে। তেওঁ উপায়ুক্ত কৈলাশ কাৰ্তিক এনক পৰ্যাপ্ত পৰিমাণে সাহায্য সামগ্ৰী উপলব্ধ কৰাবলৈ নিৰ্দেশ দিয়ে (CM Himanta Biswa Sarma visits flood affected Kamrup and Darrang district)।

মুখ্যমন্ত্ৰী ড০ শৰ্মাই কামৰূপৰ কমলপুৰ ৰাজহ চক্ৰৰ কোলাজল অঞ্চলৰ বানপীড়িত স্থানসমূহো পৰিদৰ্শন কৰে আৰু ৰাষ্ট্ৰীয় ঘাইপথৰ কাষত স্থাপন কৰা সাহায্য শিবিৰত আশ্ৰয় লোৱা লোকসকলৰ সৈতে বাৰ্তালাপ কৰে।

খোজকাঢ়ি গৈয়েই মুখ্যমন্ত্ৰী ড০ শৰ্মাই ৰাজপথত থকা তিনিটা আশ্ৰয় শিবিৰ পৰিদৰ্শন কৰে। কামৰূপ জিলাৰ বানপীড়িত স্থানসমূহ ভ্ৰমণৰ সময়ত বিজেপিৰ সভাপতি ভবেশ কলিতা, হাজোৰ বিধায়িকা সুমন হৰিপ্ৰিয়া, বিধায়ক দিগন্ত কলিতাই তেওঁক সংগ দিয়ে। কামৰূপ জিলাৰ শালমাৰা অঞ্চলো পৰিদৰ্শন কৰে মুখ্যমন্ত্ৰীগৰাকীয়ে।

ইয়াৰ লগতে দৰং জিলাৰ বান বিধ্বস্ত অঞ্চলসমূহো পৰিদৰ্শন কৰে দিনটোত। দৰং জিলাৰ পখৰুঘাটৰ দিপিলাৰ ওচৰত ছিগি যোৱা মথাউৰি পৰিদৰ্শনৰ লগতে অতি সোনকালে মেৰামতি কৰাৰ নিৰ্দেশ দিয়ে। ড০ শৰ্মাই লগতে তেওঁৰ লগত যোৱা বিধায়ক পৰমানন্দ ৰাজবংশীক জিলা প্ৰশাসনৰ সহায়ত এখন তালিকা প্ৰস্তুত কৰিবলৈ কয়।

ড০ শৰ্মাই দৰং জিলাৰ বৰ আথিয়াবাৰী অঞ্চলো পৰিদৰ্শন কৰে। মুখ্যমন্ত্ৰীৰ বানপীড়িত অঞ্চল ভ্ৰমণৰ সময়ত  দিলীপ শইকীয়া, ভবেশ কলিতা, পৰমানন্দ ৰাজবংশী, বসন্ত দাস, প্ৰাক্তন বিধায়ক গুৰুজ্যোতি দাসো উপস্থিত থাকে।