ভোগালীৰ প্ৰাকক্ষণত মুখ্যমন্ত্ৰী ড৹ হিমন্ত বিশ্ব শৰ্মাক কোনে কি উপহাৰ আগবঢ়ালে জানো আহক

হেঁপাহৰ বিহু ভোগালীক আদৰিবলৈ সাজু সমগ্ৰ অসমবাসী। শদিয়াৰ পৰা ধুবুৰীলৈকে সকলোৱে ভেলাঘৰ নিৰ্মাণৰ পৰা আদি কৰি পিঠাপনা, লাৰু আৰু বিভিন্ন পৰম্পৰাগত খাদ্য সম্ভাৰৰে ভোগালী বিহু উদযাপন কৰিবলৈ ব্যাপক প্ৰস্তুতি চলাইছে। মাঘ বিহুৰ সময়ত ভোজ ভাত খাই পুৱা মেজি জ্বলোৱাৰ এক প্ৰথা অতীজৰে পৰাই চলি আহিছে। ভোগালীত মাছৰ জুতি লোৱাতোও যেন ইয়াক উদযাপনৰ এক অবিচ্ছেদ্য নিয়ম।

জালুকবাৰী সমষ্টিৰ তিনিগৰাকী যুৱক ক্ৰমে নৃপেন কলিতা, শিৱ শীল আৰু আব্দুল মতিনৰ দ্বাৰা অংকিত মুখ্যমন্ত্ৰীৰ পৰিয়ালৰ এখন সুন্দৰ চিত্ৰ উপহাৰস্বৰূপে আগবঢ়ায়৷ এই উপহাৰটিৰ বাবে মুখ্যমন্ত্ৰীয়ে তিনিওগৰাকীকে ধন্যবাদ জ্ঞাপনেৰে সামাজিক মাধ্যমত এটা পোষ্ট শ্বেয়াৰ কৰে৷

ভোগালী বিহু সমাগত৷ এই আনন্দময় মুহূৰ্তত কমতাপুৰ স্বায়ত্তশাসিত পৰিষদৰ সাধাৰণ সদস্য প্ৰণৱজ্যোতি বৰ্মনে ৭ কিলো ওজনৰ এটা শিলঘৰীয়া মাছ, বৰা চাউলৰ পিঠা, মুড়িৰ লাড়ু, ম’হ আৰু গৰুৰ ঘিউ, দৈ উপহাৰস্বৰূপে মুখ্যমন্ত্ৰীক দিলে৷ কমতাপুৰ স্বায়ত্তশাসিত পৰিষদৰ সাধাৰণ সদস্যজনৰ লগতে পৰিষদৰ সমূহ কাৰ্যকৰ্তালৈ বিহুৰ শুভেচ্ছা জনালে মুখ্যমন্ত্ৰীয়ে৷