কুইন বনাম ববিতা

গুৱাহাটী সমষ্টিৰ বাবে কাইলৈ সমুখ সমৰত কুইন ওজা আৰু ববিতা শৰ্মা। দেওবাৰে হাইভল্টেজ নিৰ্বাচনী প্ৰচাৰ চলিল গুৱাহাটীৰ ৰাজপথত। নিৰ্বাচনী প্ৰচাৰৰ অন্তিম দিনাখন চমক দেখুৱালে কংগ্ৰেছ–বিজেপিয়ে।

কংগ্ৰেছ বিজেপি আৰু নিৰ্দলীয় প্ৰাৰ্থীৰ বিশাল বিশাল বাইক ৰেলী। কুইন ওজাৰ সমৰ্থনত উলিয়ালে বিশাল বাইক ৰেলী। মুখ্যমন্ত্ৰী সৰ্বানন্দ সোণোৱালে ফ্লেগ অফ কৰে এই বাইক ৰেলীৰ। বাইক ৰেলীৰ উদ্বোধনীৰ সময়ত উপস্থিত থাকে মন্ত্ৰী সিদ্ধাৰ্থ ভট্টাচাৰ্য, মহেন্দ্ৰ সিং আৰু অতুল বৰাকে ধৰি কেইবাজনো নেতা।

বিধায়িকা আঙুৰলতাৰ স্কুটীত উঠি প্ৰচাৰ চলালে বিজেপি প্ৰাৰ্থী কুইন ওজাই। বিজেপিৰ নিৰ্বাচনী গীতৰ তালে তালে স্কুটীৰ ওপৰতে নাচি উঠিল বটদ্ৰৱাৰ বিধায়িকাগৰাকী।

তৃতীয় পৰ্যায়ৰ নিৰ্বাচনৰ প্ৰচাৰ কাৰ্যসূচীৰ অন্তিম দিনটোত এইদৰে বিজেপি সমৰ্থকসকলৰ সৈতে দেখা গ'ল আঙুৰলতা ডেকাক ৷ ২ সহস্ৰাধিক বিজেপি কৰ্মীৰ অংশগ্ৰহণেৰে কুইন ওজাৰ বাইক ৰেলীয়ে গেৰুৱা কৰি তোলে গুৱাহাটীৰ আকাশ–বতাহ।

খানাপাৰাৰ পৰা আৰম্ভ হোৱা বিজেপিৰ বাইক ৰেলী সামৰণি পৰে উলুবাৰীৰ এছ বি দেওৰা মহাবিদ্যালয় খেলপথাৰত। আকৌ এবাৰ মোদী চৰকাৰ শ্লোগানৰে নিনাদিত হয় গুৱাহাটী মহানগৰী। ১ ঘণ্টাৰ অধিক সময় জি এছ ৰোডেৰে বাইক ৰেলী কৰি চূড়ান্ত উৎসাহেৰে প্ৰচাৰ চলালে বিজেপি কৰ্মীসকলে।

শক্তি প্ৰদৰ্শনৰ যুঁজত পিছ পৰি নৰ'ল গুৱাহাটীৰ কংগ্ৰেছ প্ৰাৰ্থী ববীতা শৰ্মাও৷ একেসময়তে বিৰোধী কংগ্ৰেছেও দেখুৱালে চমক। কংগ্ৰেছ  প্ৰাৰ্থী ববিতা শৰ্মাৰ হৈ নিৰ্বাচনী প্ৰচাৰৰ বাবে লাষ্টগে' টৰ পৰা জালুকবাৰীলৈ আৰু জালুকবাৰীৰ পৰা গীতানগৰলৈ উলিয়ালে বিশাল বাইক ৰেলী।

নিৰ্বাচনী প্ৰচাৰৰ অন্তিম দিনটোত বিশাল বাইক ৰেলীৰে ভোটাৰক আকৃষ্ট কৰাৰ চেষ্টা কংগ্ৰেছ প্ৰাৰ্থী গৰাকীৰ৷ খোলা গাড়ীত উঠি প্ৰদেশ কংগ্ৰেছৰ সভাপতি ৰিপুন বৰা, প্ৰাক্তন মন্ত্ৰী অকণ বৰাকে ধৰি বহুসংখ্যক নেতাক লগত লৈ ৰেলীত ভাগ ললে ববিতা শৰ্মাই৷

কোনোবাই যদি হাতত, কোনোবাই বাইকত কংগ্ৰেছৰ পতাকা লৈ কোনোবাই আকৌ মূৰত ৰাহুল গান্ধীৰ ফটোসম্বলিত টুপী পিন্ধি অংশ ল’লে বিশাল বাইক ৰেলীত। পথৰ কাষত ৰৈ থকা লোকক  দুহাত দাঙি সম্ভাষণ জনালে ববিতা শৰ্মাই । গীতানগৰত অন্ত পৰে ববিতা শৰ্মাৰ এই ৰেলী৷