পদুলি মুখত ৰঙালী। ৰঙালীক আদৰিবলৈ সাজু প্ৰতিজন অসমীয়া। বিহু অহাৰ লগে লগে এতিয়া ৰাজ্যৰ বিভিন্ন প্ৰান্তত দেখা গৈছে বিহু কৰ্মশালা, বিহুৰ আখৰা, চৌদিশে শুনা গৈছে ঢোলৰ গুমগুমনি। ডিব্ৰুগড়ৰ ব্ৰহ্মপুত্ৰৰ পাৰতো বিহুৰ আখৰাত ব্যস্ত এদল ডেকা–গাভৰু। ডিব্ৰুগড়ৰ বৰবিহুৱা জিতেন দাস আৰু বিহু শিল্পী ৰুবি গগৈ সন্দিকৈৰ উদ্যোগত বিহুৰ প্ৰশিক্ষণ লোৱা বহু নাচনী, ঢুলীয়া, পেঁপুৱা আখৰাত ব্যস্ত দেখা গ’ল ব্ৰহ্মপুত্ৰৰ পাৰত। কোৰোণাৰ বাবে যোৱা বছৰ বিহু পালনৰ পৰা বিৰত আছিল ৰাজ্যবাসী। এইবছৰ কিন্তু বিহুলৈ সম্পূৰ্ণ সাজু সকলো। ডিব্ৰুগড়তো এইসকল বিহুৱা দুগুণ উৎসাহেৰে সাজু হৈছে পুনৰবাৰ মঞ্চ কঁপাবলৈ। অসমৰ বিভিন্ন প্ৰান্তৰ বিহু মঞ্চত বিহুকুঁৱৰী, বিহু সম্ৰাজ্ঞী আদি প্ৰতিযোগিতাত অংশগ্ৰহণ কৰিবলৈ সাজু হৈছে নাচনী। ডিব্ৰুগড়ৰ লগতে ৰাজ্যৰ আন প্ৰান্ততো এতিয়া চলিছে বিহুৰ প্ৰস্তুতি। বাপতিসাহোন বিহুটিত এপাক কঁকাল ঘূৰাই নাচিবলৈ এতিয়া ব্যস্ত হৈ পৰিছে নাচনীহঁত। ৰাজ্যৰ চৌদিশে এতিয়া শুনা গৈছে ঢোলৰ গুমগুমনি, পেঁপাৰ সুৰীয়া মাত।
