হাতী–মানুহৰ সংঘাত আপুনি দেখিছে, বন্যহস্তীৰ উপদ্ৰৱো বহু দেখিছে, কিন্তু এই দৃশ্য চাওক, দেহ–মন পুলকিত হ’ব আপোনাৰো

হাতী–মানুহৰ সংঘাত, হাতীৰ উপদ্ৰৱ, এইবোৰ দৃশ্য আমি প্ৰায়ে দেখো। কিন্তু আজি আমি দেখুৱাম এনে কেইখনমান ছবি , যি ছবি চাই মন পুলকিত হ’ব আপোনাৰো। ফটো কেইখন চালে আপোনাৰো লাগিব যে মানুহে হাতীক উগ্ৰ নকৰালৈকে হাতী শান্ত আৰু ধৰ্যশীল৷

গোৱালপাৰা জিলাখন হাতী মানুহৰ–সংঘাতত জৰ্জৰিত ৷ তাৰ মাজতে কেমেৰাৰ লেঞ্চত বন্দী হৈছে কেইটামান অতি মনোমোহা দৃশ্য। আমি জীৱশ্ৰেষ্ঠৰ অত্যাচাৰত শান্ত-শিষ্ট জীৱ এটাও উগ্ৰৰূপ ধাৰণ কৰে৷ হাতী-মানুহৰ সংঘাতৰ মূলতে আমি মানুহে প্ৰধান দায়ী! হাতীৰ বাসস্থানৰ পৰা খাদ্যলৈকে আমিয়ে নাইকীয়া কৰিছো। হাতীৰ জাক দেখিলেই শিলগুটি মৰাৰ প্ৰৱণতা মনলৈ আহে৷

গোৱালপাৰা জিলাখন যদিওবা হাতী-মানুহৰ সংঘাতত জৰ্জৰিত, আজি যি দৃশ্য দেখুৱাম সেয়া চাই আপোনালোকৰো মন পুলকিত হ’ব। আপোনালোকেও ভাৱিবলৈ বাধ্য হ’ব যে হাতী আচলতে উগ্ৰ নহয়, অতি শান্ত৷ NEWS18 ৰ কেমেৰাৰ লেঞ্চত বন্দী হৈছে তেনে কেইখনমান দৃশ্য ৷

এখন মুকলি পথাৰত চৰি আছে এজাক বন্যহস্তী৷ নাই কোনো মানুহক আক্ৰমণ কৰাৰ উদ্দেশ্য, কেৱল মুক্তমনে বিচৰণ কৰিছে হাতীৰ এটা পৰিয়ালে৷ পৰিয়ালটোত আছে কেইবাটাও কণ কণ পোৱালিও। হাতী কেইটাই যেন কিছু জিৰণি লৈছে৷ নিজৰ মাজতে বিলিন হৈ পৰিছে৷ নিজক লৈয়ে ব্যস্ত সিহঁত৷

এক দৃষ্টিনন্দন দৃশ্য৷ পথচাৰীকো এপলক চাবলৈ বাধ্য কৰিছে৷ সঁচাকৈয়ে মনোমোহা দৃশ্য, যি দৃশ্য চাই থাকিলেও যেন হেঁপাহ নপলায়৷ জীৱশ্ৰেষ্ঠৰ সন্ত্ৰাসৰ কথা পাহৰি আপোন বিভোৰ বন্যহস্তীৰ জাক। এই দৃশ্য চাই মন্ত্ৰমুগ্ধ হোৱা মানুহেও আজি কিন্তু হাতীৰ জাকটোলৈ শিলগুটি মৰা নাই, ফুটোৱা নাই ফটকাও ৷

মানুহৰ মনবোৰো যেন কিছু সময়ৰ বাবে এই দৃশ্যই সকলো পাহৰাই পেলালে৷ মুকলি পথাৰত বিচৰণ কৰি হাতীৰ জাকৰ কেইটামানে যদি মুক্তমনে খাদ্য গ্ৰহণ কৰিছে, আন কেইটামানে আকৌ জলকেলি কৰাৰ দৃশ্য বন্দী হৈছে ৷ তাৰ মাজতে ৰং-ধেমালিৰে নিজৰ মাজতে ব্যস্ত কেইটামান হাতী৷

এনেবোৰ দৃশ্য কিন্তু সাধাৰণতে খুব কমকৈহে দেখিবলৈ পোৱা যায়, তাৰ কাৰণো আকৌ আমি জীৱশ্ৰেষ্ঠই। ধীৰ–গম্ভীৰ. শান্ত সমাহিত এই প্ৰাণীটোক পৰ্যবসিত কৰা হ’ল এটা হিংস্ৰ, উগ্ৰ প্ৰাণীলৈ৷ আজিৰ তাৰিখনত মানুহসৃষ্ট পৰিৱেশত হাতী হৈ পৰিল ত্ৰাসৰ অন্য এটা নাম৷ মুঠৰ ওপৰত বন্যহস্তীৰ এই নান্দনিক দৃশ্য প্ৰাণ ভৰি উপভোগ কৰিলে বহুতে৷