জাতিধ্বংসী বিধেয়কৰ বিৰুদ্ধে গৰজি উঠিছে অসমীয়া শিল্পী, ৫গৰাকী অভিনেত্ৰীৰ স্পষ্ট বিৰোধ

CABৰ বিৰুদ্ধে টঙালি বান্ধি ওলাই অহা প্ৰথমগৰাকী অভিনেত্ৰী প্ৰস্তুতি পৰাশৰ। আৱাহন থিয়েটাৰৰ সমূহ কলা–কুশলীৰ সৈতে ৰাজপথত নামি প্ৰতিবাদ কৰে প্ৰস্তুতিয়ে। বিধেয়কখন বাতিল নোহোৱালৈ ক্ষান্ত নোহোৱাৰ হুংকাৰ প্ৰস্তুতি পৰাশৰৰ।

নাগৰিকত্ব সংশোধনী বিধেয়কক লৈ বিৰোধ নকৰাৰ কাৰণে ছচিয়েল মিডিয়াত একাংশই প্ৰশ্ন কৰাৰ পিছতে স্থিতি স্পষ্ট কৰিলে বৰষা ৰাণী বিষয়াই। ধর্মৰ ভিত্তিত কোনো নাগৰিকত্ব সংশোধনী বিধেয়ক নানিবা। কেবৰ জৰিয়তে আমাৰ ভাষা–সংস্কৃতি ধ্বংস কৰাৰ ভাৰ লৈ ৰাইজৰ চকুত খলনায়ক হ’ব। মুখ্যমন্ত্ৰী সৰ্বানন্দ সোণোৱালক উদ্দেশ্যি মন্তব্য বৰষাৰ।

আন্দোলনত নানামিলেও মই এই বিৰোধৰ প্ৰতি পূৰ্ণ সমৰ্থন আগবঢ়াইছো, অসমীয়া জাতি বাচি থাকিবই লাগিব। নিশিতা গোস্বামীয়ে সংবাদমাধ্যমৰ আগত কয়। ইয়াৰ আগতে অভিনেত্ৰীগৰাকীক কিছুলোকে সমালোচনা কৰা দেখা গৈছিল। সমালোচকৰ মুখ বন্ধ কৰি নিশিতাই এনেদৰে উত্তৰ দিয়ে।

সদ্যমুক্তি ছবি ‘প্ৰতিঘাত’ৰ অভিনেত্ৰী অমৃতা গগৈয়ে নাগৰিকত্ব সংশোধনী বিধেয়কৰ বিৰুদ্ধে কঠোৰ স্থিতি প্ৰকাশ কৰিছে। জাতিৰ বিপদ মতা সিদ্ধান্তৰ মই বিৰোধী বুলি কয় অমৃতাই। সংকটৰ সময়ত জাতিৰ সৈতে মই আছো বুলি আশ্বস্ত কৰে জনপ্ৰিয় অভিনেত্ৰীগৰাকীয়ে।

জুবিন গাৰ্গৰ ‘মিছন চাইনা’ ছবিৰ জৰিয়তে ছবিজগতত ভুমুকি মৰা অভিনেত্ৰী, গায়িকা দীপলীনা ডেকাই কেবৰ বিৰুদ্ধে মুকলিকৈ বিৰোধ প্ৰকাশ কৰিছে। ফেচবুকৰ জৰিয়তে দীপলীনাই অসমবাসীক জাতিধ্বংসী বিধেয়ক কোনো পধ্যেই মানি ল’ব নোৱাৰি বুলি কয়। অসমীয়া ভাষা–সংস্কৃতি বিপন্ন হোৱা কোনো সিদ্ধান্ত গ্ৰহণ নকৰিবলৈ তেওঁ অনুৰোধ কৰে।