Assam Boat Accident: শুকুৰবাৰে দুপৰীয়া চিকিৎসক বিক্ৰমজিৎ বৰুৱাৰ পৰিয়ালৰ লোকে দুৰ্ঘটনা সংঘটিত হোৱা স্থানত উপস্থিত হৈ কান্দি কান্দি চাকি বন্তি জ্বলাই ভৰালুইতত (Brahmaputra) সেৱা কৰিলে। মাথোঁ আশা এটাই - দৈনিক বৰলুইত ইপাৰ সিপাৰ হৈ থকা বিক্ৰমজিতৰ যদি কিবা দোষ হৈছিল , সেয়া মাফ কৰি উদ্ধাৰ কৰি দিয়ক। মৰ্মান্তিক..., দুৰ্ভাগ্যজনক...! বুধবাৰে নিমাতি ঘাটত সংঘটিত হোৱা ভয়ংকৰ ফেৰী দুৰ্ঘটনাত এতিয়াও সন্ধানহীন হৈ আছে মাজুলীৰ চিকিৎসালয়ত কৰ্মৰত তথা যোৰহাটৰ চিকিৎসক বিক্ৰমজিৎ বৰুৱা। নিৰুদিষ্ট বিক্ৰমজিৎ আৰু লক্ষীমপুৰৰ ইন্দ্ৰেশ্বৰ বৰাৰ সন্ধান বিচাৰি এন ডি আৰ এফ আৰু এচ ডি আৰ এফ বাহীনীয়ে নিৰন্তৰ গতিত আজিও অব্যাহত ৰাখিছে অভিযান। ইপিনে বিক্ৰমজিৎৰ পত্নীৰ ভগ্নীয়ে NEWS18 ৰ আগত ক্ষোভেৰে কলে-" দুৰ্ঘটনা হোৱাৰ পাছতহে যে পৰিবৰ্তন আহে, সেই ধাৰা কেতিয়া সলনি হব।" "কিয় পূৰ্বৰে পৰাই যাত্ৰীৰ নিৰাপত্তাক লৈ গুৰুত্ব প্ৰদান নকৰিলে। দুটি কণমানিক লৈ বিক্ৰমজিতৰ পত্নীয়ে কেনেদৰে সময় পাৰ কৰিছে, সেয়া কোনে উপলব্ধি কৰিব?" তেওঁ কয়।
