বাঢ়িয়েই আছে উচ্চতা! ৫০ ফুট উচ্চতাৰ অমিতা গছকলৈ এতিয়া মঙলদৈত কৌতুহল, গুটি বিচাৰি হাহাকাৰ অঞ্চলাবাসীৰ

সাধাৰণতে অমিতা গছৰ সৰ্বাধিক উচ্চতা ২০-২৫ ফুট হয় যদিও দৰং জিলাৰ মঙলদৈত এডাল ৫০ ফুট উচ্চতাৰ অমিতা গছে সকলোৰে দৃষ্টি আকৰ্ষণ কৰাৰ লগতে ইয়াক কেন্দ্ৰ কৰি অঞ্চলটোত একপ্ৰকাৰ কৌতুহল আৰু  চাঞ্চল্যৰ সৃষ্টি হৈছে।

মঙলদৈ নগৰৰ কাষৰ সৰু থেকেৰাবাৰী গাঁৱৰ জমছেদ আলী নামৰ এজন লোকৰ ঘৰৰ বাৰীত আছে এই ৫০ ফুট উচ্চতাৰ অমিতা গছজোপা। এতিয়া এই অসাধাৰণ অমিতা গছ জোপাকলৈ ৰাইজৰ মাজত চলিছে সৰৱ চৰ্চা। এই অমিতা গছ জোপা চাবলৈ দৈনিক শ শ লোকে ভিৰ কৰিছেহি জমছেদ আলীৰ ঘৰত।

সকলোকে হতভম্ব কৰি তোলা এই বিশেষ অমিতা গছজোপা সন্দৰ্ভত গৃহস্থ জমছেদ আলীয়ে সাংবাদিকৰ আগত প্ৰকাশ কৰে যে, পুলি অৱস্থাত অমিতা গছজোপা সাধাৰণ অমিতা গছৰ দৰেই  লহপহকৈ বাঢ়ি আহে আৰু এটা সময়ত ফল দিবলৈ আৰম্ভ কৰে। সাধাৰণতে এডাল অমিতা গছ ৪-৫ বছৰহে জীয়াই থাকে যদিও এইজোপা অমিতা গছে  প্ৰায় ১৫ বছৰ ধৰি নিয়মিত ভাৱে ফল দি আহিছে বুলি জানিবলৈ দিয়ে গৃহস্থই।

ইপিনে গছজোপাৰ উচ্চতা ক্ৰমাৎ বৃদ্ধি পাই অহাৰ পৰিপ্ৰেক্ষিতত গছজোপাৰ পৰা অমিতা পাৰি অনাৰ ক্ষেত্ৰত গৃহস্থই সমস্যাৰ সন্মুখীন হয়, যাৰফলত এবছৰ ধৰি গছজোপাৰ পৰা অমিতা খাবলৈ সক্ষম হোৱা নাই বুলি সাংবাদিকৰ  আগত প্ৰকাশ কৰে গৃহস্থ জমছেদ আলীয়ে।

আনহাতে অঞ্চলটোৰ বিভিন্ন লোকে এই গছজোপাৰ অমিতা খাইছে আৰু একাংশই ইয়াৰ বীজ বিচাৰে বুলি জানিব পৰা গৈছে। অমিতা গছজোপাৰ সন্দৰ্ভত গৃহস্থ জমছেদ আলীৰ অনুভৱ জানিব বিচৰাত তেওঁ কয় যে, এয়া আল্লা-ঈশ্বৰৰ এক লীলা। সম্প্ৰতি অমিতা গছজোপাৰ পৰা অমিতা খাবলৈ নাপালেও গছজোপা কাটি পেলোৱাৰ কথা চিন্তা কৰা নাই গৃহস্থই।