বালাকোটৰ এয়াৰ ষ্ট্ৰাইকৰ বাবে ৩ মাহ পাকিস্তানত আবদ্ধ এগৰাকী মহিলা, স্বামীক পোৱাৰ পিছতে ধন্যবাদ জনালে মোদীক

পুলৱামা আক্ৰমণৰ পিছত ভাৰতীয় বায়ুসেনাই পাকিস্তানৰ বালাকোটত সন্ত্ৰাসবাদীৰ ঘাটি তচনচ কৰিছিল। ভাৰতৰ এই এয়াৰ ষ্ট্ৰাইকৰ পিছতে দুয়োখন দেশৰ মাজত বৃদ্ধি পাইছিল সংঘাত। দুয়োখন দেশৰ মাজত যুদ্ধসদৃশ পৰিস্থিতিৰ বাবে তিনিমাহ ধৰি পাকিস্তানত আবদ্ধ হৈ থাকিবলগীয়া হ’ল এগৰাকী ভাৰতীয় মহিলাই। প্ৰায় তিনিমাহ পাকিস্তানত কটোৱাৰ পিছত ৩০ মে’ত হায়দৰাবাদত উপস্থিত হয় মহিলাগৰাকী। নিজৰ স্বামীক পোৱাৰ পিছতে প্ৰধানমন্ত্ৰী মোদী আৰু সুষমা স্বৰাজক ধন্যবাদ জনাই মহিলাগৰাকীয়ে।

এ এন আইৰ সৈতে সাক্ষাৎকাৰত মহিলাগৰাকীয়ে কয় – ‘মোৰ ইচ্ছা আছিল যে মই পৰিয়ালৰ সৈতে হায়দৰাবাদত ঈদ পালন কৰিম। পৰিয়ালৰ সৈতে ঈদ পালন কৰিবলৈ পাই মই যথেষ্ট সুখী। মোৰ বিষয়টো উত্থাপন কৰাত আৰু ভিছা লাভত সহায় কৰাৰ বাবে প্ৰধানমন্ত্ৰী মোদী আৰু তদানীন্তন বিদেশ মন্ত্ৰী সুষমা স্বৰাজক ধন্যবাদ জনাইছো।’

উল্লেখযোগ্য যে পাকিস্তান মূলৰ এই মহিলাগৰাকীৰ নাম সুমেৰা। ২০১১ চনত হায়দৰাবাদ নিবাসী শ্বেখ এজাজ মহিয়ুদ্দিনৰ সৈতে বিবাহ হৈছিল মহিলাগৰাকীৰ। দুই সন্তানৰ সৈতে পিতৃক চাবলৈ পাকিস্তানলৈ গৈছিল মহিলাগৰাকী। ২৭ ফেব্ৰুৱাৰীত লাহোৰৰ পৰা ওভতাৰ কথা আছিল সুমেৰাৰ। কিন্তু ভাৰত–পাকিস্তানৰ মাজত সৃষ্টি হোৱা পৰিস্থিতিৰ বাবে বিমান বাতিল হৈছিল। ফলত ৫ দিনলৈ লাহোৰ বিমানবন্দৰত থাকিবলগা হৈছিল মহিলাগৰাকী।

সুমেৰাই কয় যে যেতিয়া তেওঁ স্বামী আৰু শাহুৱেকক এই কথা কৈছিল, তেতিয়া তেওঁলোকে বিদেশ মন্ত্ৰণালয়ৰ হস্তক্ষেপ বিচাৰি অনুৰোধ জনাইছিল। ইয়াৰ কিছুদিন পিছতে মহিলাগৰাকীৰ লগতে সন্তানৰ ভিছাৰ ম্যাদ উকলি গৈছিল। বৰ্তমান ভাৰতলৈ ওভতা মহিলাগৰাকী অতিকৈ আনন্দিত।