যৌনাংগৰ কেঞ্চাৰ বুলি মিছা প্ৰচাৰ চলাই ধন আত্মসাৎ, জে’ললৈ গ’ল এইগৰাকী মহিলা

কেঞ্চাৰৰ মিছা খবৰ বিয়পাই মিছা প্ৰচাৰ চলাই ধন আত্মসাৎ কৰাৰ অভিযোগত জে’লৰ ভাত খাবলগীয়া হ’ল এগৰাকী মহিলাই। যৌনাংগৰ কেঞ্চাৰ বুলি মিছা প্ৰচাৰ চলাই সকলোৰে সহানুভূতি আদায়ৰ লগতে সংগ্ৰহ কৰিছিল ধন। কিন্তু পিছত সেয়া ভুৱা প্ৰচাৰ আছিল বুলি মহিলাগৰাকীৰ বিৰুদ্ধে অভিযোগ উঠে আৰু আদালতত নিজৰ দোষ স্বীকাৰ কৰে ২৯ বছৰীয়া মহিলাগৰাকীয়ে। সকলোৰে বিশ্বাসত আঘাত হানিছে তেওঁ, এই কথাৰে মহিলাগৰাকীক শাস্তি বিহে আদালতে।

২০১৫ চনৰ জুন মাহত ইংলেণ্ডৰ টনী ষ্টেনডন নামৰ মহিলাগৰাকীয়ে তেওঁৰ বন্ধুবৰ্গক জনায় যে তেওঁ কেঞ্চাৰত আক্ৰান্ত। টাৰ্মিনেল ভেজিনেল কেঞ্চাৰত আক্ৰান্ত তেওঁ। ইয়াৰ পিছৰে পৰা বিভিন্ন সময়ত বন্ধুবৰ্গৰ আগত চিকিৎসাৰ খবৰ জনায় থাকে। ইমান নিখুটভাৱে মহিলাগৰাকীয়ে এই কাম কৰিছিল যে কেতিয়াও বন্ধুবৰ্গৰ সন্দেহ হোৱা নাছিল।

ইয়াৰ পিছত টনীৰ পিতৃ কেঞ্চাৰত আক্ৰান্ত হয়। বন্ধুসকলক তেওঁ জনায় যে তেওঁৰ পিতৃৰ শেষ ইচ্ছা কন্যাৰ বিয়াখন চাই যোৱা। ইয়াৰ পিছত টনীৰ বিয়াৰ বাবে টকা তোলাৰ ব্যৱস্থা কৰে বন্ধুবৰ্গই। টনীৰ এই খবৰত চকুলো টুকিছিল বহুতে। কেঞ্চাৰৰ চিকিৎসাৰ ফলত টনীৰ চুলি গুচি যোৱা দেখি সহানুভূতি জাগিছিল সকলোৰে মনত।

বিয়াৰ পিছত লাহে লাহে টনীক লৈ সন্দেহ আৰম্ভ হয় বন্ধুসকলৰ মাজত। এটা ফোন কলত তেওঁলোকে বুজিব পাৰে যে টনীৰ সেই কথা মিছা। কেঞ্চাৰ আক্ৰান্ত হোৱা বুলি কিয় বন্ধুবৰ্গক জনাইছিল টনীয়ে, সেই কথা জনা হোৱা নাই, কিন্তু বন্ধুবৰ্গই তেওঁ প্ৰশ্ন কৰিবলৈ আৰম্ভ কৰে।

আদালতত বিচাৰকে জনায় যে মহিলাগৰাকীয়ে সকলোৰে সৈতে মিথ্যাচাৰৰ আশ্ৰয় লৈছে। বিশেষকৈ বিভিন্ন সাক্ষাৎকাৰৰ যোগেদি সকলোকে বুৰ্বক বনাইছে। বন্ধুবৰ্গই দিয়া টকা বিয়া আৰু অৱসৰ বিনোদনত ব্যৱহাৰ কৰিছে। ইতিমধ্যে সেই টকাৰ বৃহৎ অংশ ওভতাই দিয়াৰ নিৰ্দেশ দিয়াৰ লগতে মহিলাগৰাকীক ৫ মাহৰ কাৰাদণ্ড বিহে আদালতে।