কলম্বিয়াত ভয়ংকৰ বাছ দুৰ্ঘটনা, ২০ জন যাত্ৰীৰ মৃত্যু, ১৫ জন আহত, কি আছিল দুৰ্ঘটনাৰ কাৰণ?

শনিবাৰে দক্ষিণ-পশ্চিম কলম্বিয়াৰ পেন-আমেৰিকান হাইৱে’ত এখন বাছ বাগৰি পৰাত কমেও ২০ জন লোক নিহত হোৱাৰ লগতে ১৫ জন লোক আহত হয়। কলম্বিয়াৰ দক্ষিণ-পশ্চিমৰ পাষ্টো চহৰ আৰু প’পায়ানৰ মাজত সংঘটিত হৈছিল এই ভয়ংকৰ পথ দুৰ্ঘটনা। সংবাদ মাধ্যমৰ বাতৰি অনুসৰি দুৰ্ঘটনাগ্ৰস্ত হোৱা বাছখন কলম্বিয়াৰ দক্ষিণ-পশ্চিম কোণৰ বন্দৰ চহৰ টুমাকোৰ পৰা উত্তৰ-পূবৰ কালিলৈ গৈ আছিল। এই দুই ঠাইৰ মাজত দুৰত্ব প্ৰায় ৩২০ কিলোমিটাৰ (২০০ মাইল)।

সংবাদ সংস্থা এ এন আইৰ বাতৰি অনুসৰি নাৰিঅ’ যান-বাহন আৰক্ষী বিভাগৰ কেপ্তেইন এলবাৰ্টলেণ্ড আগুডেলোৱে কয় যে দুৰ্ভাগ্যজনকভাৱে এই পথ দুৰ্ঘটনাত ২০ জন লোকৰ মৃত্যু হৈছে। আগুডেলোৱে জনোৱা মতে, বাছখনৰ কাৰিকৰী বিসংগতিৰ বাবেই এই দুৰ্ঘটনা সংঘটিত হোৱাৰ সন্দেহ কৰা হৈছে। তথাপিও এই পথ দুৰ্ঘটনাৰ আঁৰৰ কাৰণসমূহৰ তদন্ত চলি আছে।

20 killed in Colombia bus accident

Read @ANI Story | https://t.co/N49lSiY8Bl#columbia #busaccident pic.twitter.com/zrD2Xk8DEl

— ANI Digital (@ani_digital) October 15, 2022

উল্লেখযোগ্য যে, সেই অঞ্চলৰ যাতায়ত আৰু পৰিবহণ সঞ্চালক কৰ্ণেল অস্কাৰ লেম্প্ৰিয়াই সাংবাদিকলৈ প্ৰেৰণ কৰা এক বাৰ্তাত কয় যে তদন্তকাৰীয়ে বাছখনৰ ব্ৰেক ব্যৱস্থাত কাৰিকৰী বিসংগতিৰ সম্ভাৱনাৰ ওপৰত নিৰীক্ষণ কৰি আছে। বাছ দুৰ্ঘটনাৰ পিছত প্ৰাৰম্ভিক খবৰ অনুসৰি কুঁৱলীময় অঞ্চলত এটা কেকুৰীত চালকজনে বাছখনৰ নিয়ন্ত্ৰণ হেৰুৱাই পেলাইছিল। আৰক্ষী আৰু অগ্নিনিৰ্বাপক বাহিনীৰ লোকে ৯ ঘণ্টাৰ প্ৰচেষ্টাৰ অন্তত বাছখনৰ পৰা আহতসকলক উদ্ধাৰ কৰি চিকিৎসালয়লৈ পঠিওৱাৰ লগতে মৃত লোকসকলকো উদ্ধাৰ কৰিবলৈ কৰিবলৈ সক্ষম হয়।