‘প্ৰজ্ঞান’ক বুকুত সাবটি জোনবাইৰ দেশত হেৰাল ‘বিক্ৰম’, অক্টোবৰত আহিব পাৰে ভাল খবৰ!

জোনবাইৰ দেশত এতিয়াও সন্ধানহীন চন্দ্ৰযান ২ৰ লেণ্ডাৰ বিক্ৰম। ৰ’ভাৰ প্ৰজ্ঞানক বুকুট সাবটি ক’ত, কি অৱস্থাত আছে লেণ্ডাৰ বিক্ৰম? সেয়া এতিয়াও ৰহস্য। ৭ ছেপ্টেম্বৰত চন্দ্ৰপৃষ্ঠত অৱতৰণৰ প্ৰাকমুহূৰ্তত সন্ধানহীন হৈছিল লেণ্ডাৰ বিক্ৰম। সংযোগ বিচ্ছিন্ন হৈছিল ISROৰ নিয়ন্ত্ৰণ কক্ষৰ সৈতে। ISROৰ বিজ্ঞানী, সমগ্ৰ দেশবাসীক আশাহত কৰি চন্দ্ৰপৃষ্ঠত হেৰাই গৈছিল বিক্ৰম।

কিন্তু আশা এৰি দিয়া নাই ISROৰ বিজ্ঞানীয়ে। কিদৰে লেণ্ডাৰ বিক্ৰমক বিচাৰি উলিয়াব পাৰি তাক লৈ অহৰহ চেষ্টা অব্যাহত ৰাখিছে বিজ্ঞানীসকলে। ISROৰ লগতে NASAৰ বিজ্ঞানীসকলেও লেণ্ডাৰ বিক্ৰমৰ সন্ধানত অব্যাহত ৰাখিছে অভিযান। কিন্তু NASAৰ লুনাৰ ৰিকনছেন্স অৰ্বিটাৰেও বিচাৰি উলিয়াব পৰা নাই বিক্ৰমক।

শেহতীয়াকৈ NASAৰ লুনাৰ অৰ্বিটাৰে সংগ্ৰহ কৰিছে চন্দ্ৰপৃষ্ঠৰ আলোকচিত্ৰ। কিন্তু সেই আলোকচিত্ৰত ধৰা নপৰিল বিক্ৰমৰ অৱস্থিতি। চন্দ্ৰপৃষ্ঠৰ দক্ষিণ মেৰুত আন্ধাৰ হৈ থকা বাবে ধৰা নপৰিল বিক্ৰমৰ অৱস্থিতি। অক্টোবৰত পুনৰ লেণ্ডাৰ বিক্ৰমৰ সন্ধান কৰিব বুলি প্ৰকাশ কৰিছে NASAই।



NASAৰ বিজ্ঞানীয়ে জনাইছে যে বিক্ৰম লেণ্ডাৰ চন্দ্ৰপৃষ্ঠৰ দক্ষিণ মেৰুৰ পৰা প্ৰায় ৬০০ কিলোমিটাৰ দূৰত্বত পৰিছিল। ১৭ ছেপ্টেম্বৰত LRO–এ সেই স্থানৰ ওপৰেৰে প্ৰদক্ষিণ কৰিছিল। কিন্তু আন্ধাৰ হোৱা বাবে সেই স্থানৰ সঠিক ফটো সংগ্ৰহ কৰিব পৰা নগ’ল। সেয়েহে লেণ্ডাৰ বিক্ৰমৰ সন্ধান পোৱা নগ’ল। অক্টোবৰত পুনৰ NASAই বিক্ৰমৰ সন্ধান কৰিব, যেতিয়া সেই স্থানত পোহৰ থাকিব।

Our @LRO_NASA mission imaged the targeted landing site of India’s Chandrayaan-2 lander, Vikram. The images were taken at dusk, and the team was not able to locate the lander. More images will be taken in October during a flyby in favorable lighting. More: https://t.co/1bMVGRKslp pic.twitter.com/kqTp3GkwuM

— NASA (@NASA) September 26, 2019

ইফালে, ISROৰ অধ্যক্ষ ড০ কে সিৱনে কয় যে চন্দ্ৰযান–২ৰ অৰ্বিটাৰে সঠিকভাৱে কাম কৰি আছে। অৰ্বিটাৰৰ সকলো যন্ত্ৰই সঠিকভাৱে কাম কৰি আছে। আমি লেণ্ডাৰ বিক্ৰমৰ পৰা কোনো সংকেত পোৱা নাই। কিন্তু আমাৰ অৰ্বিটাৰে এতিয়াও চন্দ্ৰৰ চাৰিওফালে প্ৰদক্ষিণ কৰি আছে।