লণ্ডনত গুৰুজনাৰ মণিকূট প্ৰতিষ্ঠা কৰা কৰুণা সাগৰ দাসৰ বিয়োগ 

ভূপেন হাজৰিকাৰ ভাষাৰে ইংলেণ্ড আৰু স্কটলেণ্ডত গ্লোবেল বিহুতলীৰ সৃষ্টি কৰা কৰুণা ‘সাগৰ’ দাস আৰু নাই।  বুধবাৰে পুৱা ৫.৪০ বজাত লণ্ডনত শেষ নিশ্বাস ত্যাগ কৰে দাসে। পেছাত চিকিৎসক দাস অসমীয়া সংস্কৃতিৰ আজীৱন সাধক আছিল। দাসৰ জন্ম হৈছিল হাজোত।

লণ্ডনত Shankardev International Cultural Centre খুলি গুৰুজনাৰ মণিকূট প্ৰতিষ্ঠা কৰিছিল দাসে। যোৱা ২২ বছৰে তেওঁ ‘Luit to Thames’ নামৰ অসমীয়া আৰু ইংৰাজী ভাষাৰ আলোচনী খনৰ সম্পাদনা কৰি আহিছিল।

ড৹ ভূপেন হাজৰিকাই তেওঁৰ উদাৰতাত মুগ্ধ হৈ ‘সাগৰ’ উপাধি প্ৰদান কৰিছিল। আৰু তেতিয়াৰ পৰাই কৰুণা কান্ত দাস কৰুণা ‘সাগৰ’ দাস নামেৰে জনাজাত হৈছিল। ড৹ ভূপেন হাজৰিকাই দাসক এই উপাধি প্ৰদান কৰি কৈছিল – “যোৱা ৫ বছৰে ধৈৰ্য আৰু সাহসেৰে অসমীয়া সংস্কৃতিক বিশ্বমুখী কৰাৰ তোমাৰ প্ৰয়াসৰ তুলনা নাই। তুমি ইংলেণ্ড আৰু স্কটলেণ্ডত গ্লোবেল বিহুতলী গঢ়ি তুলিছা।“