» বিশ্ব

কাবুল বিমানবন্দৰত বিস্ফোৰণৰ ঘটনাত যিয়েই জড়িত নাথাকক কিয়, তেওঁলোকক বিচাৰি উলিয়াই শাস্তি দিয়াৰ হুংকাৰ দিলে মাৰ্কিন ৰাষ্ট্ৰপতি জো বাইডেনে। বৃহস্পতিবাৰে কাবুল বিমানবন্দৰৰ বাহিৰত আত্মঘাতী বোমা বিস্ফোৰণত আফগানিস্তানত মোতায়েন কৰা আমেৰিকাৰ ১২জন সেনাৰ মৃত্যু হয়। মুঠ ৬০জন লোকে প্ৰাণ হেৰুৱাইছে এই বিস্ফোৰণত। এই আক্ৰমণৰ দায়িত্ব স্বীকাৰ কৰিছে আইএছআইএছে।

জো বাইডেনে কয়, ‘যিয়ে এই আক্ৰমণ সংঘটিত কৰিছে আৰু যিয়ে আমেৰিকাৰ ক্ষতি বিচাৰে, তেওঁলোকে এটা কথা জানি থওক, আমি তেওঁলোকক ক্ষমা নকৰো। আমি পাহৰি নাযাওঁ। আমি তেওঁলোকক বিচাৰি উলিয়াই শাস্তি দিম।’

নিহত মাৰ্কিন সেনাসকললৈ শ্ৰদ্ধাঞ্জলি জনাই বাইডেনে তেওঁলোকক নায়ক বুলি সম্বোধন কৰে। মাৰ্কিন ৰাষ্ট্ৰপতিগৰাকীয়ে স্পষ্ট কৰি দিয়ে, পূৰ্বৰ ঘোষণা মতেই আগন্তুক ৩১ আগষ্ট পৰ্যন্ত কাবুলত মাৰ্কিন সেনাই উদ্ধাৰ অভিযান চলাই যাব।

তেওঁ কয়, ‘আমি সন্ত্ৰাসবাদীক ভয় নকৰো। নিজৰ অভিযান বন্ধ নাৰাখো। উদ্ধাৰ অভিযান যিদৰে চলিছে চলি থাকিব।’ জো বাইডেনে কয়, পুনৰ আক্ৰমণৰ আশংকা থাকিব পাৰে বুলি জানিও মাৰ্কিন সেনাই এই উদ্ধাৰ অভিযান চলাই লৈ যোৱাৰ সিদ্ধান্ত লৈছে। কিন্তু একে সময়তে মাৰ্কিন ৰাষ্ট্ৰপতিগৰাকীয়ে স্বীকাৰ কৰিছে, কাবুলত বিস্ফোৰণ কাণ্ডত আইএছৰ সৈতে তালিবানৰ যোগসূত্ৰৰ কোনো প্ৰমাণ এতিয়াও পোৱা নাই।