যুদ্ধ-বিধ্বস্ত ইউক্ৰেইনৰ ৰাজধানী কিয়েভত পুনৰ মুকলি হ’ব ভাৰতীয় দূতাবাস; ১৭ মে’ত নতুন ৰাষ্ট্ৰদূতে খুলিব তলা 

সুদীৰ্ঘ দুই মাহৰ অন্তত ভাৰতৰ বিদেশ মন্ত্ৰণালয়ে যুদ্ধ জৰ্জৰ ইউক্ৰেইনৰ ৰাজধানী কিয়েভত দূতাবাস খোলাৰ সিদ্ধান্ত গ্ৰহণ কৰিছে। নতুন ৰাষ্ট্ৰদূত হৰ্ষ কুমাৰ জৈনে অহা ১৭ মে’ তাৰিখে বন্ধ হৈ থকা ভাৰতীয় দূতাবাসৰ তলা খুলিব । শুকুৰবাৰে নতুন দিল্লীত বিদেশ মন্ত্ৰণালয়ে এই কথা ঘোষণা কৰিছে।

বিদেশ মন্ত্ৰণালয়ে পূৰ্বৰ ৰাষ্ট্ৰদূত পাৰ্থ সাতপঠিক নতুন দায়িত্ব অৰ্পণ কৰি জৈনক ইউক্ৰেইনৰ ৰাষ্ট্ৰদূতৰ দায়িত্ব অৰ্পণ কৰিছে । উল্লেখযোগ্য যে পাৰ্থ  সাতপঠিয়ে ৰাছিয়াৰ ইউক্ৰেইন আক্ৰমণৰ সময়ত দেশখনত আৱদ্ধ হৈ থকা ভাৰতীয় সকলক সুকলমে উদ্ধাৰ কৰা কাৰ্যত গুৰুত্বপূৰ্ণ ভূমিকা পালন কৰিছিল।

প্ৰচণ্ড যুদ্ধৰ সময়তে যোৱা মাৰ্চৰ ১৩ তাৰিখে কিয়েভৰ পৰা দূতাবাস চুবুৰীয়া পোলেণ্ডৰ ৰাজধানী ৱাৰছ’ত অস্থায়ীভাৱে স্থাপন কৰা হৈছিল। যোৱা মাহত ইংলেণ্ডৰ প্ৰধানমন্ত্ৰী বৰিছ জনচনেও ইউক্ৰেইনত দূতাবাস মুকলি কৰাৰ কথা ঘোষণা কৰিছিল।

আনহাতে এতিয়াও অন্ত পৰা নাই ৰাছিয়াৰ আক্ৰমণ আৰু ইউক্ৰেইনৰ আত্মৰক্ষাৰ স্বাৰ্থত প্ৰত্যাক্ৰমণ। ইউক্ৰেইনৰ ৰাষ্ট্ৰপতি ভলডিমিৰ জেলেনেস্কিয়ে সদৰী কৰা মতে বৃহস্পতিবাৰে নিশা ৰাছিয়াৰ সেনাই চাৰ্নীহিভ অঞ্চলৰ এখন বিদ্যালয়ত আকাশমাৰ্গৰে গোলাবৰ্ষণ কৰিছে। তেওঁ লগতে কয় “আমি এই সংঘাতৰ সমাধানসূত্ৰ উলিওৱাটো যথেষ্ট প্ৰয়োজন হৈ পৰিছে আৰু ইউক্ৰেইন চৰ্ত বিহীন আলোচনাৰ কাৰণে সাজু।“

ইফালে ফিনলেণ্ড আৰু চুইডেনে NATOবাহিনী যোগদান কৰাত ক্ষোভিত হৈ পৰিছে ৰাছিয়া। ৰাষ্ট্ৰসংঘক প্ৰতিনিধিত্ব কৰা ৰাছিয়াৰ এজন কূটনীতিবিদে এই সন্দৰ্ভত মন্তব্য কৰি কয় – এনে কাৰ্যৰে দুইখন নাৰ্ডিকে দেশ নিৰপেক্ষ হৈ থকা নাই আৰু ৰাছিয়াৰ আক্ৰমণৰ লক্ষ্য হৈ পৰিছে।