এজন সমৰ্পিত সাংবাদিক থকা ইতিহাসৰ প্ৰথম ফুটবলাৰত পৰিণত হ’ব ক্ৰিষ্টিয়ানো ৰোনাল্ডো

ক্ৰিষ্টিয়ানো ৰোনাল্ডোৱে বিশ্ববাসীক হতবাক কৰিছিল যেতিয়া তেওঁ মানচেষ্টাৰ ইউনাইটেডৰ পৰা অনানুষ্ঠানিকভাৱে প্ৰস্থান কৰাৰ পিছত তেওঁৰ পৰৱৰ্তী গন্তব্যস্থান ঘোষণা কৰিছিল। পৰ্তুগীজ চুপাৰষ্টাৰজনে ইউৰোপৰ পৰা প্ৰথমবাৰৰ বাবে বাহিৰলৈ আহি চৌদি আৰৱৰ ক্লাব আল-নাছৰত যোগদান কৰা কাৰ্যই এছিয়ান ফুটবলৰ বাবে এক বৃহৎ উৎসাহ হিচাপে কাম কৰিব। যেতিয়াৰ পৰা ৰোনাল্ডো চৌদি আৰৱত উপস্থিত হৈছে, দেশখন আৰু ইয়াৰ লোকসকল এক উন্মাদনাত পৰিছে। দৰাচলতে, চৌদি আৰৱৰ এটা সংবাদ মাধ্যমই দেশখনত ৰোনাল্ডোৰ উন্মাদনাক এক নতুন স্তৰলৈ লৈ গৈছে।

চৌদি আৰৱৰ এটা ব্যৱসায়িক বাতৰি পৰ্টেল আৰৱীয়ান বিজনেছে বিশ্বৰ প্ৰথম ‘ৰোনাল্ডো সংবাদদাতা’ক নিয়োগ কৰিব বিচাৰিছে যাৰ বাবে তেওঁলোকে ইচ্ছুক প্ৰাৰ্থীৰ আৱেদন আমন্ত্ৰণ কৰি এটা বিজ্ঞাপন মুকলি কৰিছে। চাকৰিৰ বিৱৰণত কোৱা হৈছে যে প্ৰাৰ্থীজনে আল-নাছৰৰ সকলো খেল সামৰি ল'ব আৰু ‘‘চৌদি আৰৱত থিতাপি লোৱাৰ লগে লগে ৰোনাল্ডোৰ জীৱনৰ দৈনিক আপডেট আৰু অন্তৰ্দৃষ্টি প্ৰদান কৰিব।’’ এইটো পৃথিৱীত প্ৰথমবাৰৰ বাবে হৈছে যে এজন নিৰ্দিষ্ট ফুটবলাৰৰ বাবে এজন সমৰ্পিত সাংবাদিক থাকিব।

আৰৱীয়ান বিজনেছৰ মুখ্য সম্পাদক মেথিউ আমলোটে কয় যে, ‘‘ৰোনাল্ডো হৈছে পৃথিৱীৰ আটাইতকৈ ডাঙৰ তাৰকা আৰু আটাইতকৈ ডাঙৰ কাহিনী। তেওঁ নিজেই এক উদ্যোগ আৰু সেয়েহে তেখেতৰ নিজৰ পূৰ্ণকালীন সংবাদদাতাৰ যোগ্য। চৌদি আৰৱলৈ তেওঁৰ পদক্ষেপে আৰৱ ফুটবলক বিশ্বৰ মঞ্চত দৃঢ়ভাৱে ৰাখে আৰু সফল আবেদনকাৰীয়ে এই উন্মোচিত কাহিনীটোত এক গুৰুত্বপূৰ্ণ ভূমিকা পালন কৰিব।’’

উল্লেখযোগ্য যে, আল-নাছৰত ক্ৰিষ্টিয়ানো ৰোনাল্ডোৰ চুক্তিৰ মূল্য প্ৰতি বছৰে ২০০ নিযুত ইউৰো যিয়ে তেওঁক ফুটবলৰ ইতিহাসত সৰ্বকালৰ সৰ্বাধিক উপাৰ্জনকাৰী ফুটবলাৰ হিচাপে পৰিগণিত কৰিছে। চুক্তিখনত এটা ধাৰাও আছে, যিয়ে ৰোনাল্ডোক ২০৩০ ফিফা বিশ্বকাপ আয়োজনৰ বাবে চৌদি আৰৱৰ প্ৰচেষ্টাৰ বাবে আনুষ্ঠানিক ব্ৰেণ্ড এম্বেছাদৰ কৰি তুলিছে।
৩ জানুৱাৰীত ৰোনাল্ডোক আনুষ্ঠানিকভাৱে আল-নাছৰ খেলুৱৈ হিচাপে চিনাকি কৰা হৈছিল। অৱশ্যে, ৫ জানুৱাৰীত চৌদি প্ৰ'লীগত তেওঁ আল-তাইৰ বিৰুদ্ধে খেল আৰম্ভ কৰিব নে নাই সেয়া এতিয়াও স্পষ্ট নহয়।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।