ক'ৰোনাৰ কালৰূপত নিয়ন্ত্ৰণহীন চীন! মছজিদ আৰু শীতল ভঁৰালত ৰখা হৈছে মৃতদেহ

চুবুৰীয়া ৰাষ্ট্ৰ চীনত কোভিড-১৯ মহামাৰীৰ ফলত হোৱা মৃত্যুৰ সংখ্যা ইমানেই বৃদ্ধি পাইছে যে এতিয়া পৰিস্থিতি নিয়ন্ত্ৰণৰ বাহিৰত থকা দেখা গৈছে। চীনত ক'ৰোনাৰ পৰা হোৱা মৃত্যুৰ পিছত মানুহৰ মৃতদেহ মছজিদ আৰু গুদামতো ৰখা হৈছে। এক বিশেষ প্ৰতিবেদনত কোৱা হৈছে যে বেইজিঙৰ নিউ ষ্ট্ৰীটৰ মছজিদ এতিয়া মৃতদেহ ৰখাৰ বাবে ব্যৱহাৰ কৰা হৈছে। সামাজিক মাধ্যমত ইয়াৰ সৈতে সম্পৰ্কিত এটা ভিডিঅ' ভাইৰেল হৈছে য'ত মছজিদৰ সকলো ঠাইতে মানুহৰ মৃতদেহ ৰখা দেখা গৈছে। আনহাতে আন কিছুমান প্ৰতিবেদনত এইটোও কোৱা হৈছে যে ক'ৰোনা ভাইৰাছৰ ফলত হোৱা মৃত্যুৰ পিছত মানুহক সমাধিস্থ কৰাৰ বাবে কবৰস্থানত অপেক্ষা কৰাৰ বাবে মছজিদত মৃতদেহ ৰখা হৈছে।

সামাজিক মাধ্যমত শ্বেয়াৰ কৰা এটা ভিডিঅ'ত দেখুওৱা হৈছে যে মৃতদেহবোৰ বেইজিংৰ নিউ মছজিদত সমাধিস্থ কৰাৰ অপেক্ষাত ৰখা হৈছে। এইটোও কোৱা হৈছে যে চীনৰ চৰকাৰে ক'ৰোনাৰ পৰা মৃত্যু হোৱা লোকৰ প্ৰকৃত সংখ্যা প্ৰকাশ কৰা নাই। মানুহে বিষয়াসকলৰ পৰিসংখ্যা বিশ্বাস কৰা নাই আৰু সেইবোৰত ভুল বিচাৰি পাইছে। কেৱল এয়াই নহয়, চীনত ক'ৰোনাত হোৱা মৃত্যুৰ ফলত পৰিস্থিতি ইমানেই ভয়ংকৰ হৈ পৰিছে যে গাহৰিৰ মাংস ৰখাৰ বাবে নিৰ্মাণ কৰা শীতল ভঁৰালত ক'ৰোনা ৰোগীৰ মৃতদেহও ৰখা হৈছে।
দেশখনৰ শাসনাধিষ্ঠ কমিউনিষ্ট পাৰ্টিৰ এজন সচিবে চীনত মুকলি ঠাইত মৃতদেহৰ স্তূপ দেখি কান্দিছিল আৰু অন্ত্যেষ্টিক্ৰিয়া নোহোৱালৈকে মৃতদেহবোৰ গুদামত ৰাখিবলৈ নিৰ্দেশ দিছিল। এইটো কোৱা হৈছে যে বেইজিঙত গাহৰিৰ মাংস ৰখাৰ বাবে নিৰ্মাণ কৰা ঔদ্যোগিক শীতল ভঁৰালবোৰ মৃতদেহ ৰখাৰ বাবে ব্যৱহাৰ কৰা হৈছে।

এক প্ৰতিবেদন অনুসৰি, য়ুকৱানিং ৱেৰহাউচত ১৫,০০০ মৃতদেহ ৰখা হৈছে। সামাজিক মাধ্যমত শ্বেয়াৰ হোৱা তথাকথিত লিক হোৱা চৰকাৰী নথিপত্ৰ উদ্ধৃতি দি কোৱা হৈছে যে চীনত 'জিৰো-কোভিড নীতি'ৰ কঠোৰ নিয়ম আঁতৰোৱাৰ পিছতেই মাত্ৰ ২০ দিনৰ ভিতৰত ২৫ কোটি লোক কোভিড-১৯ ৰ দ্বাৰা সংক্ৰমিত হ'ব পাৰে।

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|