প্ৰায় ৫ মাহৰ মূৰত আন এক নতুন ৰূপত ৰাহুল গান্ধী; এই ৰূপে দৃষ্টি আকৰ্ষণ কৰিছে নেটিজেনৰ

ৰাহুল গান্ধীক ‘ভাৰত জোড়ো যাত্ৰা’ৰ পিছত এক নতুন ৰূপত দেখা পোৱা গৈছে। বৰ্তমান সামাজিক মাধ্যমত তেওঁৰ কেইখনমান ফটো আৰু ভিঢিঅ’ পোহৰলৈ আহিছে য’ত তেওঁৰ নতুন ৰূপ দেখা পোৱা গৈছে। ৰাহুল গান্ধীয়ে বিগত বৰ্ষৰ ছেপ্তেম্বৰৰ পৰা ২০২৩ চনৰ জানুৱাৰীলৈ কন্যাকুমাৰীৰ পৰা কাশ্মীৰলৈ চলা কংগ্ৰেছৰ ‘ভাৰত জোড়ো যাত্ৰা’ৰ সময়ত দাড়ি খুৰুৱা নাছিল। তেওঁ দীঘল দাড়ি থকা চেহেৰাটোৰ জৰিয়তে এক সচেতন ব্যক্তিৰ প্ৰতিচ্ছবি দাঙি ধৰিব বিচৰাৰ অনুমান কৰা হৈছিল।

কংগ্ৰেছ নেতা ৰাহুল গান্ধীক এসপ্তাহৰ ভ্ৰমণত ইউকেত উপস্থিত হোৱাৰ সময়ত এক নতুন অৱতাৰত দেখা পোৱা যায়। তেওঁ ভাৰত জোড়ো যাত্ৰাৰ সময়ত ৰখা চুলি আৰু দাড়ি কাটিছে। তেওঁ  ইউকেৰ কেমব্ৰিজ বিশ্ববিদ্যালয়ত এক অনুষ্ঠানত ‘Learning to Listen in the 21st Century (একবিংশ শতিকাত শুনিবলৈ শিকা)' বিষয়টোৰ ওপৰত ভাষণ দিয়াৰ সময়ত তেওঁক বগা টি-চাৰ্টৰ সলনি চুট পিন্ধা দেখা গৈছিল। কেইবাজনো কংগ্ৰেছ নেতাই ৰাহুল গান্ধীৰ নতুন চেহেৰাৰ সেই ফটোবোৰ সামাজিক মাধ্যমত শ্বেয়াৰ কৰিছিল।

ভাৰত জোড়ো যাত্ৰাৰ পাঁচ মাহৰ সময়ছোৱাত ৰাহুল গান্ধীৰ লুকত এক ব্যাপক পৰিৱৰ্তন দেখা গৈছিল কিয়নো কংগ্ৰেছৰ সাংসদজনক যাত্ৰাৰ সময়ত সদায়ে বগা টি-চাৰ্টত দেখা গৈছিল। যাত্ৰাৰ সময়ত দাড়ি নকটাৰ সিদ্ধান্ত লোৱাৰ বাবে পাঁচ মাহত তেওঁৰ দাড়ি বাঢ়িছিল। এই সকলোবোৰে তত্ত্বই অৰিহণা যোগাইছিল যে ৰাহুল গান্ধীয়ে এক সচেতন ব্যক্তিৰ প্ৰতিচ্ছবি গঢ়াৰ চেষ্টা কৰিছিল।

কংগ্ৰেছ নেতা পৱন খেৰাই শেহতীয়াকৈ কৈছিল যে তেওঁক ৰাহুল গান্ধীৰ দাড়িৰ বিষয়ে প্ৰশ্ন সোধা হৈছিল যে ৰাহুল গান্ধীয়ে কেতিয়া দাড়ি কাটিব। দৰাচলতে, ৰাহুল গান্ধীয়েও আগতে এই প্ৰশ্নৰ সন্মুখীন হ’ব লগা হৈছিল আৰু তেওঁ কৈছিল যে যাত্ৰাৰ বাবে এনে লুক হৈছিল আৰু যাত্ৰা সমাপ্ত হোৱাৰ পিছত তেওঁ এই বিষয়ে চিন্তা কৰিব।

'Learning to Listen in the 21st Century' বক্তৃতাটো কেৱল ছাত্ৰ-ছাত্ৰীৰ মাজত হোৱা এক বক্তৃতা য'ত ৰাহুল গান্ধীয়ে ভাৰত জোড়ো যাত্ৰাৰ অভিজ্ঞতাও শ্বেয়াৰ কৰিছিল। ৰাহুল গান্ধীয়ে বিশ্ববিদ্যালয়খনৰ কৰ্পছ ক্ৰিষ্টি মহাবিদ্যালয়ৰ শিক্ষক আৰু অধ্যয়ন সঞ্চালক আৰু গ্লোবেল হিউমেনিটিজ ইনিচিয়েটিভৰ সহ-সঞ্চালক ভাৰতীয় মূলৰ অধ্যাপক শ্ৰুতি কপিলাৰ সৈতে বিগ ডাটা আৰু গণতন্ত্ৰ আৰু 'ভাৰত-চীন সম্পৰ্ক' সম্পৰ্কীয় আন এক অধিৱেশনৰো অংশ হয়।

এই সপ্তাহৰ শেষত ৰাহুল গান্ধীয়ে ইণ্ডিয়ান অভাৰচিজ কংগ্ৰেছ, ইউকে অধ্যায়ৰ প্ৰতিনিধিসকলৰ সৈতে বাৰ্তালাপ কৰিব আৰু লণ্ডনত এখন ভাৰতীয় প্ৰবাসী সন্মিলনত ভাষণ দিব।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।