অকাৰ্যকৰী থলুৱা ভেকছিন! চীনে এতিয়া ইয়াৰ নাগৰিকসকলক প্ৰদান কৰিব জাৰ্মান ভেকছিন

ভাৰতৰ চুবুৰীয়া ৰাষ্ট্ৰ চীন এতিয়া ক’ৰোনা ভাইৰাছৰ সংক্ৰমণৰ কৱলত আছে। অ’মিক্ৰনৰ চাব-ভেৰিয়েণ্ট বিএফ৭-য়ে দেশখনত একপ্ৰকাৰ ধ্বংসযজ্ঞ চলাইছে যাৰ ফলত এদিনত কেইবা হাজাৰ লোকৰ মৃত্যু ঘটাৰ লগতে লাখ লাখ লোক দৈনিক সংক্ৰমিত হৈছে। দেশখনৰ অৱস্থা এনেকুৱা পাইছে যে চিকিৎসালয়ত বিচনাৰ অভাৱ হৈছে আৰু ৰোগীসকলক চিকিৎসালয় মজিয়াত শোৱাই চিকিৎসা কৰিব লগা হৈছে। ইয়াৰোপৰি শ্মশানত অন্ত্যেষ্টিক্ৰিয়াৰ বাবে ঠাইৰো নাটনি হৈ পৰিছে। বিশেষজ্ঞসকলৰ মতে, চীনত (চীন কোভিড সংকট)অতি শীঘ্ৰেই ক’ৰোনাৰ কেইবাটাও ঢৌ আহিব। এইটো দাবী কৰা হৈছে যে চীনৰ জনসংখ্যাৰ প্ৰায় ৬০ শতাংশ লোক ক’ৰোনা সংক্ৰমণৰ দ্বাৰা আক্ৰান্ত হোৱাৰ সম্ভাৱনা আছে। এনেকুৱা স্থিতি তেতিয়া হৈছে যেতিয়া চীনে ইয়াৰ সকলো নাগৰিকক থলুৱা ভেকছিন প্ৰদান কৰাৰ দাবী কৰিছে। চীনৰ ক’ৰোনা ভেকছিনৰ কাৰ্যকৰিতা সম্পৰ্কে পূৰ্বেও বহু প্ৰশ্ন উত্থাপন কৰা হৈছিল, এতিয়া হয়তো চীনেও ইয়াৰ থলুৱা ভেকছিনত বিশ্বাস কৰা নাই। সেয়েহে দেশখনে এতিয়া ইয়াৰ নাগৰিকসকলক জাৰ্মানে তৈয়াৰ কৰা ভেকছিন দিয়াৰ সিদ্ধান্ত গ্ৰহণ কৰিছে।

জাৰ্মান চৰকাৰৰ এজন মুখপাত্ৰই বুধবাৰে কয় যে বাৰ্লিনে ইয়াৰ প্ৰথমটো বায়'এনটেক কোভিড-১৯ ভেকছিন চীনলৈ প্ৰেৰণ কৰিছে। তেওঁ জানিবলৈ দিয়ে যে এই ভেকছিন প্ৰথমতে চীনত বাস কৰা জাৰ্মান প্ৰব্ৰজনকাৰীসকলক দিয়া হ’ব। চীনৰ চৰকাৰী সংবাদ সংস্থা ছিনহুয়াৰ মতে, বৰ্তমানলৈকে ৬০ বছৰৰ অধিক বয়সৰ জনসংখ্যাৰ ৮৭ শতাংশ লোকক সম্পূৰ্ণৰূপে টীকাকৰণ কৰা হৈছে, কিন্তু ৮০ বছৰৰ অধিক বয়সৰ বৃদ্ধসকলৰ মাত্ৰ ৬৬.৪ শতাংশ লোকৰহে টীকাকৰণ কৰা হৈছে। চীনে ইয়াৰ নাগৰিকক থলুৱা ভেকছিন চিনোফাৰ্ম আৰু কৰোনাভেক প্ৰদান কৰিছে। কিন্তু এই দুয়োটা ভেকছিন ক’ৰোনাৰ বিৰোধী যুঁজত অকাৰ্যকৰী যেন প্ৰমাণিত হোৱা দেখা গৈছে। এক অনুমান অনুসৰি, চীনৰ ৰাজধানী বেইজিঙৰ জনসংখ্যাৰ ৭০ শতাংশ ক’ৰোনা ভাইৰাছৰ দ্বাৰা আক্ৰান্ত হৈছে। চীনা মহামৰী বিশেষজ্ঞ (এপিডেমিঅ'লজিষ্ট) উ জুনিঅ'ই আগন্তুক ৩ মাহত দেশখনত ক’ৰোনাৰ তিনিটা ঢৌৰ প্ৰকোপৰ ভৱিষ্যতবাণী কৰিছে। তেওঁ দাবী কৰিছে যে চীনে বৰ্তমান ক’ৰোনা ভাইৰাছ সংক্ৰমণৰ প্ৰথম ঢৌৰ সন্মুখীন হৈছে আৰু ইয়াৰ শীৰ্ষ আগন্তুক জানুৱাৰীৰ মাজভাগত আহিব পাৰে। চীনত চন্দ্ৰ নৱবৰ্ষ ২১ জানুৱাৰীৰ পৰা আৰম্ভ হ’ব, যি সময়ত মানুহে ভ্ৰমণ কৰিব, বজাৰত যথেষ্ট ভিৰ হ’ব, সেইবাবে ক’ৰোনাৰ দ্বিতীয় ঢৌ হ’ব পাৰে।

এপিডেমিঅ'লজিষ্ট উ জুনিঅ'ৰ মতে, আগন্তুক জানুৱাৰীৰ শেষৰ পৰা চীনত ক’ৰোনাৰ দ্বিতীয় ঢৌ আৰম্ভ হ’ব পাৰে, যি ফেব্ৰুৱাৰীৰ মাজভাগলৈকে থকাৰ আশংকা আছে। একে সময়তে, তৃতীয়টো ঢৌ ফেব্ৰুৱাৰীৰ শেষৰ পৰা আৰম্ভ হ’ব পাৰে, যি মাৰ্চৰ মাজভাগলৈকে থাকিব পাৰে। চীনৰ বৰ্তমানৰ ক'ৰোনা সংকটৰ আঁৰত অ’মিক্ৰনৰ দুটা উপ-প্ৰকাৰ বিএ৫.২ আৰু বিএফ.৭ ৰ আছে। বৰ্তমান দেশখনৰ ৰাজধানী বেইজিঙত বিএফ.৭ ৰ কৱলত আছে।
উল্লেখ্য যে, বিশ্ব স্বাস্থ্য সংস্থাই অ’মিক্ৰনৰ বিএফ.৭ উপ-প্ৰকাৰক আটাইতকৈ সংক্ৰামক বুলি বৰ্ণনা কৰিছে। লণ্ডনস্থিত গোলকীয় স্বাস্থ্য চোৰাংচোৱা কোম্পানী এয়াৰফিনিটিয়ে অনুমান কৰিছে যে চীনত 'জিৰো কোভিড পলিচী' প্ৰত্যাহাৰৰ পিছত আৰম্ভ হোৱা ক’ৰোনা ঢৌত ২.১ নিযুত লোকৰ মৃত্যু হ'ব পাৰে। এয়াৰফিনিটিৰ মতে, চীনত কম টীকাকৰণ আৰু ভাইৰাছৰ বিৰুদ্ধে মানুহৰ এণ্টিবডীৰ অভাৱৰ বাবে মানুহৰ মৃত্যু হ'ব পাৰে।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।