US Election 2020: জ’ বাইডেনে ক’লে- ‘ভৰসা ৰাখক, মই হৈ আছো ৰাষ্ট্ৰপতি’

আমেৰিকাৰ ৰাষ্ট্ৰপতি নিৰ্বাচন ২০২০ৰ আৰম্ভণিতে ৰিপাব্লিকান দলৰ প্ৰাৰ্থী ড’নাল্ড ট্ৰাম্প আৰু ডেম’ক্ৰেটিক দলৰ প্ৰাৰ্থী জ’ বাইডেনৰ মাজত তীব্ৰ প্ৰতিদ্বন্দিতা হৈছিল। কিন্তু এতিয়া বাইডেন সংখ্যাগৰিষ্ঠতা লাভৰ দিশে আগবাঢ়িছে। বৰ্তমানলৈকে বাইডেনে ২২৩টা ভোট লাভ কৰাৰ বিপৰীতে ১৭৪টা ভোট লাভ কৰিছে ৰাষ্ট্ৰপতি ড’নাল্ড ট্ৰাম্পে। নিৰ্বাচনৰ মেজিক নম্বৰ হ’ল ২৭০। ইয়াৰ মাজতে বাইডেনে নিজৰ গৃহ ৰাজ্য ডেলাবেয়ৰত সমৰ্থকক সম্বোধন কৰে। জ’ বাইডেনে কৈছে যে, ‘মই নিৰ্বাচনৰ বৰ্তমান পৰিৱেশক লৈ সুখী। সমৰ্থকসকলক ধন্যবাদ জনাইছো। ময়েই নিৰ্বাচনত জয়লাভ কৰিম।’

বাইডেনে লগতে কয় যে, ‘মই নিৰ্বাচনত জয়লাভ কৰিম বুলি বিশ্বাসী। চূড়ান্ত ফলাফল আহিবলৈ এতিয়াও কিছুসময় বাকী। কিন্তু জয় নিশ্চিয়কৈ আমাৰেই হ’ব। যেতিয়ালৈকে সকলো বেলটৰ গননা শেষ নহয়, আমি অপেক্ষা কৰিম।’

কিন্তু ৰাষ্ট্ৰতি ড’নাল্ড ট্ৰাম্পে এতিয়া আনিছে বিস্ফোৰক অভিযাগ। ট্ৰাম্পৰ মতে,  ডেম’ক্ৰেটিক পাৰ্টীয়ে ভোট খেলিমেলিৰ চেষ্টা কৰিছে। আনকি নিশা ভাষণ দিয়াৰ কথাও ঘোষণা কৰিছে ট্ৰাম্পে য’ত থাকিব ৪০০ অতিথি।

এইপৰ্যন্ত ৪১ ৰাজ্যৰ ফলাফল স্পষ্ট হৈ পৰিছে। ফলাফল অনুসৰি,  নিউ মেক্সিকো, ভাৰমেণ্ট, কানেক্টিকাট, নিউ হেম্পশ্বায়াৰ, ৱাশ্বিংটন বা কেলিফৰ্ণিয়াৰ দৰে অঞ্চল দখল কৰি আত্মবিশ্বাসী বাইডেন।

উল্লেখযোগ্য যে মাৰ্কিন যুক্তৰাষ্ট্ৰৰ সংখ্যাগৰিষ্ঠতাৰ বাবে মেজিক নম্বৰ হৈছে ২৭০। এতিয়ালৈ চূড়ান্ত ফলাফল আহিবলৈ বহুখিনি বাকী। গতিকে এতিয়াই জয়ী বুলি ক’ব নোৱাৰি, তথাপি ট্ৰেণ্ড মতে আগুৱাই আছে বাইডেন।