US Capitol Violence: আমেৰিকাৰ ইতিহাসৰ ক’লা দিন! US কেপিটল হিল হিংসাত গুলীচালনাত মহিলাৰ মৃত্যু, ১০টা পইণ্টত জানক হিংসাত্মক কাণ্ডৰ সবিশেষ

US Capitol Violence: আমেৰিকাত ৩ নৱেম্বৰত ৰাষ্ট্ৰপতি নিৰ্বাচনৰ (US President Elections 2020) পিছতে হিংসাৰ আশংকা কৰা হৈছিল আৰু সেয়াই হ’ল অৱশেষত। জ’ বাইডেন ৰাষ্ট্ৰপতি নিৰ্বাচিত হ’ল (Joe Biden) কিন্তু বিশ্বৰ সকলোতকৈ শক্তিশালী ৰাষ্ট্ৰখনৰ ৰাষ্ট্ৰপতি হিচাপে দ্বিতীয়বাৰলৈ নিৰ্বাচিত হ’ব নোৱাৰা বিষয়টো জেদী ট্ৰাম্পে স্বীকাৰ কৰিব নোৱাৰিলে। পৰাজয় মানি ল’বলৈ কোনোপধ্যে মান্তি নোহোৱা ট্ৰাম্পে (Donald Trump) নিৰ্বাচনৰ স্বচ্ছতাক বাৰে বাৰে প্ৰত্যাহ্বান জনাই দুই নম্বৰী কৰি জ’ বাইডেন জিকাৰ কথা সজোৰে ক’বলৈ ধৰে। ট্ৰাম্পে জনমতক নস্যাৎ কৰাৰ মাজতে ৱাশ্বিংটন ডিচি স্থিত কেপিটল হিলত ট্ৰাম্পৰ উগ্ৰ সমৰ্থক হিংসুক হৈ পৰে। সংসদত লণ্ড ভণ্ড কৰি ব্যাপক হিংসা বিয়পায়। এই ভয়াৱহ সমৰ্থকৰ উগ্ৰ ৰূপ দমন কৰিবলৈ যোৱা আৰক্ষীৰ সৈতেও হতাহতি হয়। মাজতে গুলীত এগৰাকী মহিলাৰ মৃত্যু হয়। আৰক্ষীয়ে প্ৰতিবাদস্থলীৰ পৰা যথেষ্ট পৰিমাণৰ বিস্ফোৰক উদ্ধাৰ কৰে। সেনাৰ বিশেষ ইউনিটে বিক্ষোভকাৰীসকলক খেদে। আজি সন্ধিয়া ৬বজালৈকে ৱাশ্বিংটন ডিচিত কাৰ্ফিউ দিয়া হৈছে।

উল্লেখ্য যে, আমেৰিকাৰ নিৰ্বাচনত ডেম’ক্ৰেট প্ৰাৰ্থী জ’ বাইডেনে ৩০৬ আৰু ট্ৰাম্পে ২৩২ ভোট পায়। ফলাফল স্পষ্ট হোৱাৰ পিছতো ট্ৰাম্পে পৰাজয় স্বীকাৰ নকৰে। তেওঁৰ অভিযোগ যে ভোটিঙৰ আৰু গণনাৰ সময়ত বৃহৎ হাৰত গণ্ডগোল হৈছে। ইয়াৰ কাৰণে কেবাখনো ৰাজ্যত গোচৰ ৰুজু কৰা হয়। বেছিভাগ ঠাইতে ট্ৰাম্পৰ সমৰ্থকৰ আপীল খাৰিজ হয়। দুটা গোচৰত ছুপ্ৰীম ক’ৰ্টেও তেওঁলোকৰ আৱেদন খাৰিজ কৰে।

১০টা পইণ্টত জানক কি হৈছিল? কেনেকৈ বিয়পিল হিংসা?

১) বুধবাৰে ইলেক্টৰেল কলাজৰ ভোটগণনাৰ পিছত বাইডেনৰ জয় নিশ্চিত কৰাৰ পিছতে আমেৰিকাৰ সংসদৰ উভয় সদন অৰ্থাৎ চিনেট আৰু হাউচ অৱ ৰিপ্ৰেজেনটেটিভৰ বৈঠক আৰম্ভ হয়। এই সময়চোৱাতে ট্ৰাম্প আৰু ৰিপাব্লিকান পাৰ্টীৰ শ শ সমৰ্থক সংসদৰ বাহিৰত একত্ৰিত হয়।

২) নেচনেল গাৰ্ড আৰু আৰক্ষীয়ে কিবা বুজোৱাৰ আগতেই একাংশ মানুহ সংসদ চৌহদত প্ৰৱেশ কৰে। ইউএছ কেপিটল আৰু কংগ্ৰেছৰ বাহিৰত বৃহৎ হাৰত লণ্ড–ভণ্ড আৰু ধ্বংসলীলা আৰম্ভ হয়। হিংসা হয় আৰু গুলী চলে, কোনে চলালে সেয়া স্পষ্ট নহয়।

৩) ঘটনাৰ পিছত ডিচিত উপস্থিত ইউএছ আৰ্মীৰ বিশেষ ইউনিটক মাতি পঠিওৱা হয়। মাত্ৰ ২০মিনিটতে ম’ৰ্চা চম্ভালি লয় আৰ্মীয়ে। মুঠ ১১০০ স্পেচিয়াল গাৰ্ডচ এতিয়াও কেপিটল হিলৰ বাহিৰত পহৰাৰত। ৰাজধানীত কাৰ্ফিউ দিয়া হৈছে।

৪) আমেৰিকাৰ সংসদত হিংসাৰ পিছত নিৰাপত্তা ব্যৱস্থা কটকটীয়া কৰি দিয়া হৈছে। নিউয়ৰ্কৰ মেয়ৰে ১০০০ নেচনেল গাৰ্ডচ সুৰক্ষাৰ কাৰণে পঠিয়াইছে। নিউয়ৰ্কৰ মেয়ৰৰ আদেশৰ পিছতে এই নেচনেল গাৰ্ডসকল ৱাশ্বিংটন ডিচিলৈ যোৱাৰ কথা।

৫) হিংসাক লৈ জ’ বাইডেনে কয়, 'এইটো বিৰোধ নহয় বিদ্ৰোহ। মই ৰাষ্ট্ৰপতি ড’নাল্ড ট্ৰাম্পক আহ্বান জনাইছো যে তেওঁ নিজৰ শপত পালন কৰক আৰু এই ঘেৰাও কাৰ্য শেষ কৰাৰ দাবী জনাওক।' বাইডেনে লগতে লিখে যে, 'মই স্পষ্ট কৰি দিব বিচাৰিছো যে কেপিটল বিল্ডিঙত যি হুলস্থুল দেখা গ’ল সেয়া আমি নহয়, এইবোৰ আইন–কানুনত বিশ্বাস নথকা মানুহ।

৬) আমেৰিকাৰ সংসদত ট্ৰাম্প সমৰ্থকৰ বিক্ষোভৰ পিছত ৰাষ্ট্ৰপতি ট্ৰাম্পৰ কেইবাজনো ঘনিষ্ঠই পদত্যাগ কৰাৰ খবৰ আহিছে। হোৱাইট হাউছৰ প্ৰেছ চেক্ৰেটেৰী আৰু ছচিয়েল ছেক্ৰেটাৰীয়ে পদত্যাগ কৰিছে।

৭) আমেৰিকাত ট্ৰাম্প সমৰ্থক উগ্ৰ প্ৰদৰ্শনৰ পিছত হোৱাইট হাউছ আৰু কেপিটল হিলছত ভালকৈ হুলস্থুল হয়। ইয়াৰ পিছতে টুইটাৰ, ফেচবুক আৰু ইনষ্টাগ্ৰামে ট্ৰাম্পৰ একাউণ্ট ব্লক কৰি দিয়ে। লগতে কিছু টুইট আৰু ভিডিও আঁতৰাই দিয়ে। টুইটাৰে ১২ ঘণ্টা আৰু ইনষ্টাগ্ৰামে ২৪ঘণ্টালৈ ড’নাল্ড ট্ৰাম্পৰ একাউণ্ট চাচপেণ্ড কৰে।

৮) আমেৰিকাৰ সংসদত হোৱা হিংসাক লৈ প্ৰধানমন্ত্ৰী মোদীয়ে বিবৃতি দিছে। মোদীয়ে টুইট কৰিছে, ' ৱাশ্বিংটন ডিচিত হোৱা সংঘৰ্ষ আৰু হিংসাক লৈ ব্যথিত। শান্তিপূৰ্ণভাৱে ক্ষমতাৰ হস্তান্তৰকৰণ হ’ব লাগে গণতান্ত্ৰিক প্ৰক্ৰিয়াক বেআইনীভাৱে প্ৰভাৱিত কৰিব পৰা নাযায়।

৯) আমেৰিকাৰ পূৰ্বৰ ৰাষ্ট্ৰপতি বাৰাক অবামাই হিংসাত্মক ঘটনাক লৈ কয়, ‘ইতিহাসে আজিৰ দিনটো মনত ৰাখিব। এজন ৰাষ্ট্ৰপতিয়ে কেনেকৈ নিজৰ জেদ আৰু মিছা দাবীৰে পদত অধীনস্থ হৈ থাকিবলৈ বেআইনী পদ্ধতি গ্ৰহণ কৰিছে। এই মুহূৰ্তটো আমেৰিকাৰ কাৰণে লজ্জা আৰু ঘোৰ অপমানদায়ক।'

১০) আমেৰিকাৰ ৰাষ্ট্ৰপতি ট্ৰাম্পক সংবিধানৰ পঞ্চম সংশোধনীৰ জৰিয়তে আজিয়ে আঁতৰোৱা হ’ব পাৰে। আমেৰিকাৰ এটৰ্ণী জেনেৰেলে উপ ৰাষ্ট্ৰপতি মাইক পেন্সক কয় যে ২৫ সংখ্যক সংশোধনীৰ জৰিয়তে ট্ৰাম্পক আঁতৰোৱাৰ প্ৰক্ৰিয়া আজিয়ে আৰম্ভ কৰা যাওক।