'বিশ্বই কিয় নীৰৱে আমাক মৰি থকা দেখিছে?'– তালিবানৰ বিৰুদ্ধে অকলশৰীয়া যুঁজ দিয়া ১২গৰাকী নাৰীৰ প্ৰশ্ন

আফগানিস্তানত নাৰী অধিকাৰক লৈ এতিয়াও চলি আছে প্ৰতিবাদ। কিন্তু মঙলবাৰৰ প্ৰতিবাদ আছিল কিছু পৃথক। এই প্ৰতিবাদত প্ৰশ্ন উত্থাপন কেৱল আফগানিস্তানৰ শাসকৰ প্ৰতি নহয়, বিশ্ব সম্প্ৰদায়ৰ প্ৰতি তোলা হৈছে।

নাৰী অধিকাৰ কৰ্মীয়ে তালিবানৰ নিষেধাজ্ঞাৰ বিৰুদ্ধে প্ৰতিবাদ কৰাৰ লগতে ৰাজধানী কাবুলত আফগান সংকটক লৈ আন্তঃৰাষ্ট্ৰীয় সম্প্ৰদায়ৰ নিষ্ক্ৰিয়তাৰ প্ৰতিবাদত প্ৰতিবাদ কৰিছে। সেই সময়ত তেওঁলোকৰ হাতত থকা বেনাৰ-প্লেকাৰ্ডখনত লিখা আছিল– 'পৃথিৱীয়ে কিয় নিঃশব্দে আমাক মৰি থকা দেখিছে।'

সংবাদ সংস্থা এএফপিৰ এক প্ৰতিবেদন অনুসৰি, তালিবানে যোৱা আগষ্টত ক্ষমতা দখল কৰাৰ পিছত সকলো প্ৰতিবাদ নিষিদ্ধ কৰিছিল। এই নিষেধাজ্ঞাক উপেক্ষা কৰি প্ৰায় ১২গৰাকী নাৰী অধিকাৰ কৰ্মীয়ে অকলে নাৰীৰ "শিক্ষাৰ অধিকাৰ" আৰু "কাম কৰাৰ অধিকাৰ" দাবী কৰা বেনাৰেৰে তালিবানৰ বিৰুদ্ধে প্ৰতিবাদ কৰি আহিছে।

আফগানিস্তানত নাৰী অধিকাৰৰ সংগঠন মুভমেণ্ট অৱ ৱমেন এক্টিভিষ্টৰ অন্যতম সংগঠক ৱাহিদা আমিৰীয়ে কয়, "আমি ৰাষ্ট্ৰসংঘৰ মহাসচিবক আমাৰ অধিকাৰ, শিক্ষা, কামত সমৰ্থন কৰিবলৈ আহ্বান জনাইছোঁ। আমি আজি সকলোবোৰৰ পৰা বঞ্চিত হৈছোঁ।'

কাবুলৰ কূটনৈতিক অঞ্চল হিচাপে পৰিচিত গ্ৰীন জ'নত এই প্ৰতিবাদ অনুষ্ঠিত হয়। সেই অঞ্চলত কিছুমান পশ্চিমীয়া দেশৰ দূতাবাস আছে। কিন্তু তালি‍বানে এই প্ৰতিবাদত বাধা দিছে। আনকি বাতৰি সংগ্ৰহ কৰিবলৈ যোৱা সাংবাদিকৰ ওপৰতো আক্ৰমণ কৰিছে তালিবানে।