Women's World Boxing Championships: প্ৰাক্তন চেম্পিয়নক বাহিৰ কৰিলে লাভলীনাই, অলিম্পিক পদক জিকাৰ পিছত প্ৰথমবাৰ ৰিঙত নামিয়ে চমক

টকিঅ’ অলিম্পিকৰ ব্ৰঞ্জৰ পদক বিজেতা বক্সাৰ লাভলীনা বৰগোহাঁয়ে মহিলা বিশ্ব বক্সিং চেম্পিয়নশ্বীপত চমকপ্ৰদ প্ৰদৰ্শন আগবঢ়াইছে। লাভলীনাই লাইট মিডিলৱেট শাখাত প্ৰাক্তন চেম্পিয়ন চেন নিয়েন চিনক পৰাস্ত কৰি ইস্তানবুলত চলি থকা চেম্পিয়নশ্বীপৰ ৰাউণ্ড অব ১৬ত প্ৰৱেশ কৰিছে। টকিঅ’ অলিম্পিকৰ পিছত প্ৰথমবাৰ টুৰ্ণামেণ্টত অংশ লৈছে লাভলীনাই।

লাভলীনাই (৭০কেজি) চীনা টাইপেৰ বক্সাৰক ৩–২ পইণ্টৰ ব্যৱধানত পৰাস্ত কৰে। নিয়েন চিনে ২০১৮ত বিশ্ব চেম্পিয়নশ্বীপৰ ছেমি ফাইনেলত লাভলীনাক পৰাস্ত কৰিছিল।

লাভলীনাৰ নিয়েন চেনৰ বিৰুদ্ধে এয়া দ্বিতীয় বিজয়। টকিঅ’ অলিম্পিকত ব্ৰঞ্জৰ পদক জিকা লাভলীনাই কোৱাৰ্টাৰ ফাইনেলত নিয়েন চেনক পৰাস্ত কৰিছিল।

লাভলীনাৰ লক্ষ্য এইবাৰ পদকৰ ৰং সলনি কৰা। বিশ্ব চেম্পিয়নশ্বীপত ২০১৮ আৰু ২০১৯ত দুটা ব্ৰঞ্জৰ পদক দখল কৰিছিল। অসম কন্যা লাভলীনা পৰৱৰ্তী খেলত মুখামুখি হ’ব ইংলেণ্ডৰ ৩ বাৰৰ ৰাষ্ট্ৰীয় চেম্পিয়ন চিণ্ডি এনগাম্বাৰ।