Riyan Parag : IPLত ধাৰাবাহিক দুৰ্বল প্ৰদৰ্শনক লৈ তীব্ৰ সমালোচনাৰ মাজতে ৰিয়ান পৰাগৰ টুইট – ‘সময় ভাল হওক বা বেয়া...’

IPL 2023ত ধাৰাবাহিকভাৱে দুৰ্বল প্ৰদৰ্শনৰ বাবে তীব্ৰ সমালোচনাৰ সন্মুখীন হৈছে ৰাজস্থান ৰয়েলছৰ খেলুৱৈ তথা অসম সন্তান ৰিয়ান পৰাগ (Riyan Parag)। চলিত আইপিএলত এখন মেচতো ভাল প্ৰদৰ্শন কৰিবলৈ সক্ষম হোৱা নাই ৰিয়ান। ইখনৰ পিছত সিখন খেলত সুযোগ পোৱাৰ পিছতো সুযোগৰ সদ্ব্যৱহাৰ কৰিব পৰা নাই খেলুৱৈগৰাকীয়ে। প্ৰতিখন মেচতে অনুৰাগীয়ে আশা কৰে ৰিয়ানৰ পৰা এটা ভাল ইনিংছ। কিন্তু প্ৰতিবাৰেই অনুৰাগীৰ আশাত চেঁচাপানী পৰিছে।

শুকুৰবাৰে আছিল গুজৰাট টাইটানছ (Gujarat Titans) আৰু ৰাজস্থান ৰয়েলছৰ (Rajasthan Royals) মেচ। জয়পুৰৰ স্বামী মন সিং ষ্টেডিয়ামত অনুষ্ঠিত হৈছিল খেলখন। টছত জিকি প্ৰথমে বেটিং কৰা ৰাজস্থান ৰয়েলছে অতি দুৰ্বল প্ৰদৰ্শন কৰি ১৭.৫ অভাৰত ১১৮ ৰান কৰিবলৈ সক্ষম হয়। ৰাজস্থান ৰয়েলছৰ ৭ গৰাকীকৈ বেটছমেনে চুব নোৱাৰিলে দহকৰ ঘৰো। সঞ্জু ছেমছনে সৰ্বাধিক ৩০ ৰানৰ বৰঙণি আগবঢ়ায়। খেলখনত গুজৰাট টাইটানছে ১৩.৫ অভাৰতে ৯ উইকেটত জয়লাভ কৰে।

আইপিএলৰ চলিত ছিজন আৰম্ভ হোৱাৰ পূৰ্বে ৰিয়ান পৰাগে টুইট কৰি কৈছিল যে তেওঁৰ বিবেকে কৈছে যে তেওঁ এইবাৰৰ আইপিএলত এটা অভাৰত চাৰিটা ছয় কোবাব। কিন্তু চলিত ছিজনৰ আৰম্ভণিৰে পৰা ক্ৰমাগতভাৱে দুৰ্বল প্ৰদৰ্শন কৰি আহিছে প্ৰতিভাৱান খেলুৱৈগৰাকীয়ে। বৰ্তমানলৈ তেওঁ এই ছিজনত ৬খন মেচত ১০৭.৪০ ষ্ট্ৰাইক ৰেটেৰে সংগ্ৰহ কৰিছে ৫৮ ৰান।

শুকুৰবাৰে অনুষ্ঠিত হোৱা খেলখনত গুজৰাট টাইটানছ বনাম ৰাজস্থান ৰয়েলছৰ খেলখনত অসন সন্তান ৰিয়ানে ৬টা বলত সংগ্ৰহ কৰে মাত্ৰ ৪ ৰান। খেলৰ শেষত ৰিয়ান পৰাগে কৰিছে এটা গুৰুত্বপূৰ্ণ টুইট। টুইটাৰত তেওঁ লিখিছে – ‘‘Waqt acha ho ya bura Guzar he jata hai!’’, অৰ্থাৎ সময় ভালেই হওক বা বেয়া, পাৰ হৈ যায়।

Waqt acha ho ya bura Guzar he jata hai!

— Riyan Paragg (@ParagRiyan) May 5, 2023

ৰিয়ান পৰাগৰ এই টুইটতো বিভিন্নজনে কমেণ্ট কৰিছে। সুযোগৰ সদ্ব্যৱহাৰ কৰিব নোৱাৰাক লৈ বিভিন্নজনে মন্তব্য কৰিছে ৰিয়ানৰ এই টুইটত। আগলৈ অসম সন্তান ৰিয়ান পৰাগৰ প্ৰদৰ্শন উন্নত হ’ব বুলি আশা কৰিছে ক্ৰিকেট অনুৰাগীয়ে।