Jorhat Marathon: প্ৰতিকুল বতৰৰ মাজতে যোৰহাটত ৪২ কিলোমিটাৰ দৌৰি ডেৰ লাখ টকা অৰ্জন কৰিলে কোনে!

যোৰহাট জিলা ক্ৰীড়া সন্থাৰ শতবার্ষিকীৰ লগত সংগতি ৰাখি দেওবাৰে পুৱা যোৰহাটত অনুষ্ঠিত হয় মুঠ ডেৰ লাখ টকাৰ প্ৰাইজমানি মুকলি মাৰাথন প্ৰতিযোগিতা । সকলো ভাৰতীয় নাগৰিকৰ কাৰণে মুকলি ৰখা আকৰ্ষণীয় প্ৰতিযোগিতাখনক অসম অলিম্পিক সন্থা আৰু অসম এথলেটিক সন্থাই স্বীকৃতি প্ৰদান কৰে। প্ৰতিকূল বতৰৰ মাজতে দেওবাৰে পুৱা ৫ বজাত আৰম্ভ হোৱা এই মাৰাথন প্ৰতিযোগিতাত ৩৭ গৰাকী পুৰুষ আৰু ২৯ গৰাকী মহিলাই অংশ গ্ৰহণ কৰে ।

পুৰুষৰ বাবে সম্পূর্ণ মাৰাথান আৰু মহিলাৰ বাবে ১২ কিলোমিটাৰৰ হাফ মাৰাথন প্ৰতিযোগিতা অনুষ্ঠিত হয় । দেওবাৰে পুৱা এই প্ৰতিযোগিতাৰ ফ্লেগ অফ কৰে অসম অলিম্পিক সন্থাৰ সাধাৰণ সম্পাদক তথা অসম ক্ৰীড়া প্ৰাধিকৰণৰ  উপ-সভাপতি লক্ষ্য কোঁৱৰে। অনুষ্ঠানত বিশিষ্ট অতিথি হিচাপে উপস্থিত থাকে অসম এথলেটিকছ সন্থাৰ সাধাৰণ সম্পাদক অশোক ভৰালী । যোৰহাট ক্ৰীড়া সন্থাৰ বিষয়-ববীয়া, সদস্যসকলৰ লগতে যোৰহাটৰ একাংশ ক্ৰীড়ানুৰাগী লোকে এই প্ৰতিযোগিতালৈ সহযোগিতা আগবঢ়ায় ।

এই প্ৰতিযোগিতাত পুৰুষৰ শাখআত প্ৰথম স্থান দখল কৰে যোৰহাটৰ বিজয় ডেকাই । বিজয়ে ৪২.১২৫ কিলোমিটাৰ দূৰত্ব ২ ঘণ্টা ৩০ মিনিট ৫ ছেকেণ্ডত সম্পূৰ্ণ কৰে ‌। প্ৰতিযোগিতাৰ দ্বিতীয় আৰু তৃতীয় স্থান দখল কৰে ক্ৰমে পশ্চিমবংগৰ ৰূপম দেৱনাথ আৰু গোলাঘাটৰ তিখেশ্বৰ কুৰ্মীয়ে ।

মহিলাৰ শাখাত ১২ কিলোমিটাৰ দূৰত্ব ৪৯ মিনিট ৩০.৩৪ ছেকেণ্ডত অতিক্ৰম কৰি প্ৰথম স্থান দখল কৰে জোনাইৰ ৰেখামনি শইকীয়াই । দ্বিতীয় আৰু তৃতীয় স্থান দখল কৰে কাৰ্বি আংলঙৰ লিলি ফাংচুপি আৰু চৰাইদেউৰ ৰূপালী মুণ্ডাই । বিজয়ী প্ৰতিযোগিসকলক নগদ ধন সহ পুৰস্কাৰ প্ৰদান কৰা হয় । যোৰহাট মাৰাথানৰ এই ধাৰাবাহিকতা অব্যাহত ৰাখিব বুলি জানিবলৈ দিয়ে যোৰহাট জিলা ক্ৰীড়া সন্থাৰ সভাপতি শান্তনু পুজাৰিয়ে ।