உங்கள் மாவட்டத்தைத் தேர்வுசெய்க

    • Home
    • »
    • News
    • »
    • shillong
    • »
    • ইতিহাসত প্ৰথম, সীমাবিবাদৰ বাবে এলাগী হৈ ৰোৱা লাম্পীত অসম–মেঘালয়ৰ মুখ্যমন্ত্ৰী, উন্নয়নৰ আশ্বাস

    ইতিহাসত প্ৰথম, সীমাবিবাদৰ বাবে এলাগী হৈ ৰোৱা লাম্পীত অসম–মেঘালয়ৰ মুখ্যমন্ত্ৰী, উন্নয়নৰ আশ্বাস

    লাম্পীৰ দুখ, লাম্পীৰ যন্ত্ৰণা, সীমা বিবাদৰ বাবে ৪৯ বছৰ ধৰি উন্নয়নৰ পৰা বঞ্চিত লাম্পী 

    লাম্পীৰ দুখ, লাম্পীৰ যন্ত্ৰণা, সীমা বিবাদৰ বাবে ৪৯ বছৰ ধৰি উন্নয়নৰ পৰা বঞ্চিত লাম্পী 

    লাম্পীৰ দুখ, লাম্পীৰ যন্ত্ৰণা, সীমা বিবাদৰ বাবে ৪৯ বছৰ ধৰি উন্নয়নৰ পৰা বঞ্চিত লাম্পী 

    • Share this:
    ১৯৭২ চনত সুকীয়া ৰাজ্য হিচাপে স্বীকৃতি লাভ কৰিছিল মেঘালয়ে ৷ সেই তেতিয়াৰ পৰাই অসম-মেঘালয় সীমান্তৰ কামৰূপ জিলাৰ লাম্পীয়ে সীমা বিবাদৰ বাবে দেখা নাই উন্নয়নৰ মুখ ৷ অসমৰ ইতিহাসত পোন প্ৰথমবাৰলৈ দুখন ৰাজ্যৰ দুগৰাকীকৈ মুখ্যমন্ত্ৰীৰ লাম্পীত পদাৰ্পণে 'লাম্পী'লৈ কঢ়িয়াইছে আশা ৷

    সীমা বিবাদৰ বাবে ১৯৭২ চনৰ পৰাই অসমৰ মানচিত্ৰত থকা লাম্পী হৈ আহিছে সকলো ফালৰে পৰা বঞ্চিত ৷ নাই এখন ভাল স্কুল ৷ নাই হাস্পতাল ৷ খোৱাপানীৰ বাবেও কৰিবলগীয়া হয় হাহাকাৰ ৷ পানীৰ বাবে এতিয়াও একাংশ গঞা নিৰ্ভৰশীল নিজৰাৰ ওপৰত ৷ ল'ৱাৰ লাম্পীত আছে ছখন গাঁও, য'ত প্ৰায় ৪ হাজাৰ ৩শ লোকৰ বসতি ৷

    পিছে বেমাৰ এটা হ'লে বেমাৰীক নিবলৈ নাই এখন এম্বুলেঞ্চো ৷ তথ্য প্ৰযুক্তিৰ এই যুগত লাম্পীত নাপায় আপুনি মোবাইল নেটৱৰ্ক ৷ মঙলবাৰে পুৱা আমি যেতিয়া উপস্থিত হৈছিলোঁ দুৰ্গম লাম্পীত, সেই সময়ৰ পৰা বহু কথাই ভবাই তুলিছিল আমাক ৷ কেনেকৈ সম্ভৱ এয়া! এয়াৰটেল,ভোডাফোন, জিঅ' একোৰে নাই নেটৱৰ্ক ৷

    নেটৱৰ্কবিহীন সময়ছোৱাত উপায়হীন হৈ পৰিছিলোঁ আমি ৷ এজনে ক'লে, আপোনালোকে ভুৱনেশ্বৰী মন্দিৰৰ সন্মুখলৈ যাওক তাত অলপ নেটৱৰ্ক পাব ৷ গ'লো ৷ পালোঁ ৷ মোবাইল নেটৱৰ্ককে ধৰি আন বস্তু নাপালেও মানুহখিনি কিন্তু মেঘালয়ত অন্তৰ্ভুক্ত হ'ব নিবিচাৰে ৷ আমৃত্যু থাকিব বিচাৰে স্বাভিমানী অসমীয়া হৈ ৷

    এই সকল লোকৰ আশা–ভৰসাৰ থল এতিয়া মুখ্যমন্ত্ৰী ড৹ হিমন্ত বিশ্ব শৰ্মা ৷ লাম্পীৰ ইতিহাসত এয়াই প্ৰথম, এগৰাকী মুখ্যমন্ত্ৰী আহিছে লাম্পীলৈ ৷ লগত আহিছে আকৌ বিবদমান আনখন ৰাজ্যৰো মুখ্যমন্ত্ৰী ৷ প্ৰথমে মেঘালয়ৰ মুখ্যমন্ত্ৰী কনৰাড চাংমাই ক'লে, "অসমৰ মুখ্যমন্ত্ৰী ড৹ হিমন্ত বিশ্ব শৰ্মাৰ এই উদ্যোগৰ বাবে ধন্যবাদ ৷ লাম্পীকে ধৰি প্ৰায় সীমান্তৰ ১২টা স্থানত ৪৯ বছৰ ধৰি চলি আহিছে বিবাদ ৷ মই নিজে এই সমস্যাৰ সমাধান বিচাৰোঁ ৷ জটিল যদিও এই সমস্যা সমাধান কৰাটো নৈতিক কৰ্তব্য আমাৰ ৷ শুভেচ্ছামূলক এই ভ্ৰমণে এক সমাধানৰ পথ প্ৰশস্ত কৰিব ৷ যি কামে দীৰ্ঘদিন ধৰি সীমান্তবাসীয়ে ভুগি অহা দুৰ্ভোগৰ পৰা মুক্তি দিব ৷ লাম্পী অঞ্চলৰ বাসিন্দা গাৰো, খাচী আৰু গোৰ্খাসকলক ন্যায় প্ৰদান কৰি উন্নয়নৰ দিশে লৈ যাব লাগিব ৷

    আজিৰ দিনটো এক ঐতিহাসিক দিন ৷ দুই ৰাজ্যৰ মুখ্যমন্ত্ৰীৰ এয়া ৪৯ বছৰত প্ৰথম আগমন লাম্পীলৈ ৷ সদায় দিছপুৰ-শ্বিলঙত বহি সমস্যা সমাধান কৰিব বিচাৰিছিল মুখ্যমন্ত্ৰীসকলে ৷ আমি দিছপুৰ-শ্বিলঙত বহি নাথাকি গ্ৰাউণ্ড ৰিয়েলিটী বুজিব খুজিছোঁ ৷ আজিয়েই সমস্যা সমাধান হ'ব বুলি নকওঁ, কিন্তু সমস্যা সমাধান হ'বই ৷ সম্পূৰ্ণ নহ'লেও আমি অধিকাংশ সমস্যাৰ আশু সমাধা কৰিম ৷ দুয়ো ৰাজ্যৰ মাজত থকা সীমা বিবাদৰ বাবে কেন্দ্ৰীয় চৰকাৰে দিয়া বহু আঁচনিৰ পৰা বঞ্চিত হৈ আহিছে সীমান্তবাসী ৷ মোৰ অনুৰোধ ৰাইজলৈ মেঘালয়েও যদি কিবা উন্নয়নমূলক আঁচনি আপোনালোকক দিছে আপোনালোকে লৈ লওক ৷ কথা দিছোঁ আমি দুই ৰাজ্যই একেলগে কাম কৰি আমাৰ ঈপ্সিত লক্ষ্যত উপনীত হ'ম ৷"

    কনৰাড চাংমাৰ একে সুৰতে সুৰ মিলাই অসমৰ মুখ্যমন্ত্ৰী ড৹ হিমন্ত বিশ্ব শৰ্মায়ো ক'লে, " অসমৰ ৰাইজৰ হৈ কনৰাড চাংমাক আন্তৰিক ধন্যবাদ ৷ সোণালী জয়ন্তী বৰ্ষত ভৰি দিবলৈ লোৱা মেঘালয়ে সীমা সমস্যা সমাধান কৰিবলৈ লোৱা ঐতিহাসিক পদক্ষেপৰ বাবে ধন্যবাদ ৷ ১৯৭২ চনত জন্ম হোৱা মেঘালয়ৰ সৈতেই হওক বা আন সাত ভনীৰ মাজৰ সংঘাত দুখজনক ৷ অসম–মেঘালয়ৰ ১২টাকৈ স্থানত আছে সীমা বিবাদ ৷ দুয়োখন ৰাজ্যই গঠন কৰা কমিটিয়ে ইতিমধ্যে ৬টাকৈ সীমা বিবাদ থকা অঞ্চল ভ্ৰমণ কৰি সকলো বুজ লৈছে ৷ প্ৰথম ফেজত লাম্পী নাছিল যদিও লাম্পীৰ সমস্যাও প্ৰথমাৱস্থাতে শেষ কৰিব বিচাৰিছোঁ ৷ আমি কথা দিছোঁ বন্ধুত্বৰ স্পৃহা, উত্তৰ–পূৰ্বাঞ্চলৰ স্পৃহাৰে সমস্যা সমাধান কৰিব বিচাৰিছোঁ ৷''

    মুখ্যমন্ত্ৰীগৰাকীয়ে পুনৰ কয়– ''আমি এতিয়া ভেকচিন কাৰ পৰা ল'ম, শিক্ষা, বিদ্যুৎ,পথ কাৰ পৰা ল'ম? মোবাইল টাৱাৰ কাৰ পৰা ল'ম অসম নে মেঘালয়? এয়াৰটেল, জিঅ' আদিয়ে দিব ৷ কিন্তু আমি কাজিয়া কৰি থাকিলে সকলোৰে পৰা বঞ্চিত হৈ থাকিব লাগিব ৷ আমি আলোচনাৰ মজিয়াত বিবাদ নিষ্পত্তি কৰিব লাগিব ৷ দুয়োখন ৰাজ্যৰ গঠিত কমিটিৰ প্ৰতিবেদনৰ ভিত্তিত প্ৰথম ছটাকৈ স্থানৰ সীমা বিবাদ মীমাংসা কৰা হ'ব ৷ লাম্পীক বিকাশৰ পথেৰে লৈ গৈ উন্নয়নৰ দিগন্ত অনা হ'ব ৷ কেন্দ্ৰীয় চৰকাৰৰ আঁচনি আহিলেও দুয়ো ৰাজ্যৰ সীমা বিবাদৰ বাবে সেয়া ৰৈ যায় ৷ কথা দিলোঁ দুয়োখন চৰকাৰে মিলি শান্তি প্ৰতিষ্ঠা কৰিম ৷"

    সঁচাকৈয়ে এই দুই মুখ্যমন্ত্ৰীৰ প্ৰচেষ্টাত পৰিৱৰ্তন আহক লাম্পীলৈও ৷ লাম্পীয়ে পাওক ৪৯ বছৰ ধৰি সহি অহা যন্ত্ৰণাৰ পৰা মুক্তি ৷
    Published by:Gautam Barman
    First published: