দেবাংগনা কলিতাই লাভ কৰিলে জামিন; দিল্লী উচ্চ ন্যায়ালয়ে আজি প্ৰদান কৰিলে জামিন

অৱশেষত মুকলি আকাশৰ তললৈ আহিল দেবাংগনা কলিতা । আজি দিল্লী উচ্চ ন্যায়ালয়ে দেবাংগনা কলিতাৰ জামিন মঞ্জুৰ কৰে । দেবাংগনাৰ লগতে জামিন লাভ কৰিলে নাটাশা নাৰৱালে । দুয়োগৰাকী জৱাহৰলাল নেহৰু বিশ্ববিদ্যালয়ৰ গৱেষক ছাত্ৰীক দিল্লী আৰক্ষীয়ে ২০২০ চনৰ মে’ মাহত গ্ৰেপ্তাৰ কৰিছিল । উচ্চ ন্যায়ালয়ে ৫০ হাজাৰ টকাৰ ব্যক্তিগত বণ্ড (personal bond)ত দুয়োকে জামিন প্ৰদান কৰে আৰু আৰক্ষীয়ে চলাই থকা তদন্ত প্ৰক্ৰিয়াত সহযোগ কৰিবলৈ নিৰ্দেশ দিয়ে । দুয়োকে আদালতৰ অনুমতি অবিহনে বিদেশলৈ নাযাবলৈও নিৰ্দেশ দিয়ে উচ্চ ন্যায়ালয়ে ।

২০২০ৰ জানুৱাৰী-ফেব্ৰুৱাৰী মাহত দুয়োগৰাকীয়ে দিল্লীত নাগৰিকত্ব সংশোধনী আইন (CAA) বিৰোধী প্ৰতিবাদত অংশগ্ৰহণ কৰিছিল । প্ৰতিবাদ হিংসাত্মক হৈ পৰাত বহু লোকৰ মৃত্যু হৈছিল । দিল্লী আৰক্ষীয়ে দুয়োৰে বিৰুদ্ধে হিংসাত্মক কাৰ্যকলাপত জড়িত থকাৰ অভিযোগ উত্থাপন কৰি বেআইনী কাৰ্যকলাপ প্ৰতিৰোধ আইন (Unlawful Activities Prevention Act)ৰ অধীনত গোচৰ ৰুজু কৰিছিল । আজি জামিয়া মিলিয়া ইছলামীয়াৰ ছাত্ৰ আছিফ ইকবাল তানহাইও জামিন লাভ কৰিছে । যোৱা এবছৰৰ অধিক কাল দেবাংগনা তিহাৰ জেলত বন্দী হৈ আছিল । দেবাংগনা অসমৰ ডিব্ৰুগড় জিলাৰ ছোৱালী।